Фото: Голос Америки

Америка мемлекеттері ұйымының бас хатшысы Луис Альмагро Венесуэлада демократиялық өзгерістер орын алуы үшін өз қызметінен кететінін мәлімдеді.  

Ол осылай Венесуэла президенті Николас Мадуроның: «Егер Луис Альмагро өз қызметінен бас тартса ғана, Венесуэла Америка мемлекеттері ұйымына қайта кіру мәселесін қарастырады», -деген мәлімдемесіне жауап берді.

Атап өту керек, Венесуэла үкіметі аталған ұйымнан шығатынын айтып, өзге одақтас мемлекеттердің ел ішіндегі дағдарысқа байланысты қандай да бір әрекет жасауына тыйым салатындығын жеткізген еді. Ағымдағы жылдың сәуір айынан бастап, Венесуэлада ел президенті Николас Мадуроның саясатына қарсы жалпыхалықтық толқулар болып жатыр.

Луис Альмагро өзінің твиттер парақшасында : «Мен өз қызметімді Венесуэладағы тәуелсіздіктің орнына ұсынамын. Біз Венесуэлада толық тәуелсіздік орнатпайынша, ондағы қиындықтарды еңсеруге араласудан бас тартпаймыз. Бұл дағдарысқа көз жұмып қарап отыра алмаймыз», -деп жазды. Бас хатшы сондай-ақ, Венесуэладағы саяси тұтқындарды босату, елге азық-түлік пен дәрі-дәрмек жеткізу үшін гуманитарлық көмек шараларын ұйымдастыру, парламентке оның құзыреттілігін қайтару мен тәуелсіз сот билігін орнату – бірінші кезектегі мәселелер екендігін жеткізді.

“The Qazaq Times”