فوتو: tobyl-torgai.kz

استانادا ءباسپاسوز، راديو جانە ينتەرنەت-جۋرناليستيكا سالاسىنا ارنالعان «ۇركەر-2017» ۇلتتىق سىيلىعىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى. ءبىر اي كولەمىندە كەلىپ تۇسكەن جۇزدەن استام ءوتىنىمنىڭ اراسىنان ۇزدىك دەپ تانىلعان جۇمىس اۆتورلارىنا ەستەلىك مۇسىنشە مەن اقشالاي سىيلىقتار تابىستالدى.

«ۇزدىك فوتوسۋرەت» اتالىمىندا «ەگەمەن قازاقستان» رەسپۋبليكالىق گازەتىنىڭ قىزمەتكەرى ەرلان وماروۆ جەڭىمپاز اتاندى. «كازاحستانسكايا پراۆدا» رەسپۋبليكالىق گازەتىنىڭ وكىلى ۆالەنتينا فيرونوۆانىڭ ماقالاسى «ۇزدىك تالدامالىق ماتەريال» دەپ تانىلسا، «ۇزدىك رەپورتاج» جاساعانى ءۇشىن «Nationaldigitalhistory e-history.kz» ءجۋرناليستى ولجاس بەركىنباەۆ ماراپاتتالدى. شالقار راديوسىنداعى «ءان دومبىرا» حابارى – «ۇزدىك راديوباعدارلاما»، «استانا راديوسى» - «وڭىرلىك ۇزدىك راديوستانتسيا»، «درۋجنىە رەبياتا» گازەتى – «ۇزدىك سالالىق باسىلىم»، «Nationalgeographic» باسىلىمى – «ۇزدىك جۋرنال»، وقو-داعى «رەيتينگ» گازەتى – «ۇزدىك وڭىرلىك باسىلىم»، «Massaget.kz» سايتى – «مەدياسەرپىن» اتالىمدارىنىڭ يەگەرى بولدى.

ۇزدىك سۇحبات قۇرعان Kapital.kz ءتىلشىسى ۆيكتوريا گوۆوركوۆا، ۇزدىك جۋرناليستىك زەرتتەۋ جۇرگىزگەن «ەگەمەن قازاقستان» گازەتىنىڭ وكىلى – جانبولات اۋپباەۆ، جۋرناليستىك قىزمەتىن جاڭا باستاپ جاتقان جاستاردىڭ اراسىنان ەرەكشە كوزگە تۇسكەن «7kun.kz» سايتىنىڭ ءتىلشىسى – ءمولدىر يمانمادي بولدى.

ايتا كەتەيىك، مامىر ايىنىڭ باسىندا قر اقپارات جانە كوممۋنيكاتسيالار ءمينيسترى داۋرەن اباەۆ جۋرناليستەردى باسپا، راديو جانە ينتەرنەت جۋرناليستيكا  سالاسىنداعى تۇڭعىش «ۇركەر» ۇلتتىق سىيلىعىنا قاتىسۋعا شاقىرعان ەدى. بايقاۋعا قاتىسۋ تۋرالى وتىنىشتەر 7 مامىر مەن 7 ماۋسىم ارالىعىندا urker@el.kz ەلەكتروندىق پوشتاسى ارقىلى قابىلداندى. ۇسىنىلعان ەڭبەكتەردى بەلگىلى قوعام قايراتكەرلەرى، زيالى قاۋىم وكىلدەرى مەن كاسىبي جۋرناليستەردەن قۇرالعان قازىلار القاسى ساراپقا سالدى.

“The Qazaq Times”