«The Qazaq Times» اقپارات اگەنتتىگىنىڭ وتاندىق اقپارات كەڭىستىگىنە شىققانىنا 5 جىل تولدى. وسى ۋاقىت ىشىندە ازاماتتىق قوعامنىڭ دامۋى مەن تاۋەلسىز جۋرناليستيكانىڭ وركەندەۋىنە قال-قادىرىمىزشە قىزمەت ەتۋگە تىرىسىپ كەلدىك.  تاۋەلسىز بولدىق. اشىق كوزقاراسىمىزدى انىق كورسەتە الدىق. اۋەلگى باعىتىمىزدى، جۋرناليستيكاعا ءتان بەيتاراپتىق قاعيداسىن ۇستاندىق. بۇرا تارتپادىق،  بۇقپانتايلاپ قالمادىق. ەلدەگى ساناۋلى وتاندىق تاۋەلسىز باق-تىڭ قاتارىندا بولدىق. 

بۇل كۇندە سايتىمىزدىڭ قازاق جانە اعىلشىن ءتىلدى اقپارات كەڭىستىگىنە ۇسىنعان كونتەنتتەر سانى 100 مىڭعا جەتتى. بۇل كونتەنتتەردە حالىقارالىق جانە ەل ىشىندەگى ەلەۋلى ساياسي، الەۋمەتتىك ماڭىزدى دەگەن وقيعالاردى، سولارعا قاتىستى ساراپتامالار قامتىلدى. بۇدان تىس، عىلىم-تەحنولوگيا، كىسىلىك قۇقىق، تاريح، ادەبيەت تاقىرىپتارىندا دا ءبىرشاما مول كونتەنت قورىنا يە بولدىق.

جىل سايىن الەمدىك اقپاراتتان اقش-قىتاي، اقش-رەسەي، قىتاي-تايۋان، قىتاي-شىنجاڭ جانە ورتا، تاياۋ-شىعىس، اۋعانستان، رەسەي، كارى قۇرلىق ەۋروپانىڭ ەكونوميكالىق جانە گەو-ساياسي جاعدايىن، جاڭالىقتارىن قازاق وقىرماندارىنا جەتكىزۋگە تىرىستىق.

ال، ەل ءىشى ماسەلەلەرىنەن، بيىلعىنى ايتقاندا، جىل باسىنداعى ماجىلسىمەندەردى سايلاۋدان باستاپ جىل ورتاسىنداعى اۋىل اكىمدەرىن سايلاۋداعى كورىنگەن كەمشىلىكتەر مەن زاڭ بۇزۋشىلىقتاردى، ءوز تالاپ تىلەگىن ايتۋعا بەيبىت شەرۋگە شىققانداردىڭ قۇزىرلى ورگانداردىڭ كۇشتەپ ۇستاپ جاتقاندارىن، سونداي-اق "ەستۋشى مەمەكەت" تۇجىرىمداماسىن ۇسىنعان ەل پرەزيدەنتىنىڭ ورىندالماي جاتقان ۋاعدالارى تۋرالى اشىق قاۋزاپ كەلدىك.

ءوتىپ بارا جاتقان سىيىر جىلىنداعى تورتكىل دۇنيەنىڭ تۇكپىر-تۇكپىرىندەگى ايتۋلى وقيعالاردىڭ، قازاق ەلىنە قاتىسى، ىقپالى بولۋى مۇمكىن دەگەن اۋقىمدى ماسەلەلەردىڭ جاڭالىعىن، جاي-جاپسارىن اشقان ساراپاتامالارىن قازاق قوعامىنا، سانالى، كوزقاراقتى ورتاعا جەتكىزۋگە كۇش سالدىق.

«The Qazaq Times» اقپاراتتىق، قوعامدىق-ساياسي پورتالىنىڭ جۇمىس ىستەگەنىنە 5 جىل تولۋىنا وراي، بىزگە سەنىم بىلدىرگەن كوزقاراقتى وقىرماندارىمىزعا ايتار العىسىمىز شەكسىز! ساناۋلى تاۋەلسىز اقپارات قۇرالىنىڭ ءبىرى رەتىندە، بۇراۋىنا سۇراۋى ىلەسىپ جۇرەتىن مەملەكەتتىك تەندىرگە تەلمىرتپەي، ءوز وي، ءوز پوزيتسيامىزدى ساقتاۋعا زور مۇمكىندىك بەرگەن دەمەۋشى ازاماتتارعا دا مىڭ دا ءبىر العىس!

رەداكتسيامىزدىڭ اتىنان، ەلدىڭ اماندىعىن، جۇرتتىق تىنىشتىعىن، بارشا وتانداستارىمىزدىڭ، ءيىسى قازاق قانداستارىمىزدىڭ باي-قۋاتتى بولۋىن شىن جۇرەكتەن تىلەيمىز! تاۋەلسىز اقپارات كەڭىسىگى كەڭىپ، ازاماتتىق قوعام العا باسا بەرگەي!

“TheQazaqTimes”