قۇقىقبۇزۋشىلىق قۇربانى بولعان بالالاردىڭ سۋرەتىن جاريالاعاندار جازالاناتىن بولدى

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات جانە كوممۋنيكاتسيالار ماسەلەلەرى بويىنشا وزگەرىستەر مەن تولىقتىرۋلار ەڭگىزۋ تۋرالى» زاڭ جوباسىنا سايكەس، ەندى قۇقىقبۇزۋشىلىقتاردىڭ قۇربانى بولعان بالالاردىڭ سۋرەتتەرى مەن ولار تۋرالى جەكە دەرەكتەردى جاريالاۋ 200 اەك دەيىن ايىپپۇل تولەۋگە اكەلىپ سوعۋى مۇمكىن. بۇل تۋرالى قازاقستان رەسپۋبليكاسى اقپارات جانە كوممۋنيكاتسيالار مينيسترلىگى حابارلادى.

بالالارعا قارسى ورىندالعان قىلمىستىق ارەكەتتەن زارداپ شەككەن جەتكىنشەكتەردىڭ بەينەسىن، ولار تۋرالى تولىق دەرەكتەردى جاريالاعانى ءۇشىن جەكە تۇلعالارعا – 5 اەك، وكىلەتتى  تۇلعالار، شاعىن كاسىپكەرلىك سۋبەكتىلەرى مەن ۇكىمەتتىك ەمەس ۇيىمدارعا – 25 اەك، ورتاشا كاسىپكەرلىك سۋبەكتىلەرىنە – 50 اەك، ءىرى كاسىپكەرلەرگە – 100 اەك كولەمىندە ايىپپۇل سالىنادى. اتالعان فاكتى قايتالانعان جاعدايدا، جەكە تۇلعالار مەملەكەتكە بەلگىلەنگەن ايىپپۇل مولشەرىنەن 10 ەسە ارتىق، 50 اەك كولەمىندە قارجى بەرۋگە مىندەتتەلسە، شاعىن كاسىپكەرلەرلىك سۋبەكتىلەرى مەن ۇكىمەتتىك ەمەس ۇيىمدار – 50 اەك، ورتا جانە ءىرى كاسىپورىندار 100-200 اەك مولشەرىندە ايىپپۇل  ارقالايدى.

بەلگىلەنگەن زاڭنىڭ تالاپتارىن ورىنداماي، اكىمشىلىك جاۋاپكەرشىلىككە قاتارىنان بىرنەشە رەت  تارتىلۋ  - بۇقارالىق اقپارات قۇرالىنىڭ جابىلۋىمەن اياقتالادى.

“The Qazaq Times”