فوتو: astana.gov.kz

استانانىڭ ەسىل، اقبۇلاق جانە سارىبۇلاق وزەندەرىنىڭ ارناسىن تازالاۋدان كۇن سايىن بالدىر، ءشوپ-شالاڭ، تۇرمىستىق قالدىقتار سەكىلدى قوقىستار سىرتقا كوپتەپ شىعارىلىپ جاتىر. بۇل تۋرالى «استانا-ەسىل» مكقك مامانى مۇحيت باقبەرگەنۇلى مالىمدەدى، دەپ حابارلايدى اكىمدىكتىڭ ءباسپاسوز قىزمەتى. 

ءۇش وزەننىڭ ارناسىن قالدىقتاردان تازارتۋ بويىنشا اتقارىلىپ جاتقان شارالاردىڭ ناتيجەسى بويىنشا، سوڭعى اپتا ىشىندە جۇمىسشىلار 10 توننا قوقىس جيناعان.

«ءۇش وزەننىڭ ىشىندە «سارىبۇلاق» قوقىسقا تولىپ، قاتتى لاستانعان. ەسىل جانە اقبۇلاق، سونداي-اق سارىبۇلاقتىڭ جاعاسى كۇن سايىن تازارتىلادى. بىراق كۇننىڭ كۇرت ىسۋى بالدىرلاردىڭ كوپتەپ وسۋىنە اسەرىن تيگىزۋدە»، - دەيدى م.باقبەرگەنۇلى.

جازعى مەرزىمدە تۇرمىستىق قالدىقتار مەن قوقىستى جيناۋعا 30 جۇمىسشى تارتىلادى. ماماننىڭ پىكىرى بويىنشا، قالا وزەندەرىنىڭ قاتتى لاستانۋىنا ادامداردىڭ دا قاتىسى بار.

«ءۇش وزەننىڭ ارناسىنان قوقىس پەن قالدىق تاڭنىڭ اتىسى مەن كەشتىڭ باتىسىنا دەيىن جينالادى. ەسىل وزەنىنىڭ جاعاسى كۇن سايىن تازارتىلىپ، سول اۋماقتا قوقىس تاستايتىن جاشىكتەر مەن بەينەباقىلاۋدىڭ بار بولعانىنا قاراماستان، قالدىق كوپ جينالىپ، وزەن ارناسى قاتتى لاستانادى. سارىبۇلاق وزەنىنىڭ ارناسىنان كۇن سايىن بوس بوتەلكە قۇتىلارى مەن تەمەكىنىڭ قالدىقتارى سەكىلدى ونداعان پاكەت قوقىستى سىرتقا شىعارامىز. بۇل تۇرعىدا ادامداردىڭ تابيعاتقا، ءوز قالالارىنا جاناشىرلىقپەن قارامايىنشا، جۇمىسشىلاردىڭ ەڭبەگىن باعالامايىنشا، ناتيجە وسى كۇيىندە قالا بەرەدى. سول سەبەپتى تۇرعىنداردىڭ تازالىق ماسەلەسىنە سالعىرت قاراماۋىن وتىنەمىز»، -دەدى م.باقبەرگەنۇلى.

قالا تازالىعىنا سالعىرت قارايتىن تۇرعىندار تەك استانادا عان ەمەس. الماتى قالاسىنىڭ دا ازيا ەلدەرىندەگى ەڭ لاس قالا ەكەنىن ەستەن شىعارماۋ كەرەك. ونسىزدا ەكولوگياسى ناشار قالالاردىڭ ودان ارى لاستانۋىنا ادامدار جول بەرمەسە ەكەن دەيمىز.

“The Qazaq Times”