ءدۇبىرلى گالا-كونتسەرتپەن استانادا اسكەري وركەسترلەردىڭ ءVى حالىقارالىق «اسكەري كەرنەي» فەستيۆالى ءوز مارەسىنە جەتتى دەپ حابارلايدى قر ۇلتتىق ۇلانىنىڭ ءباسپاسوز قىزمەتى. «قازاقستان» سپورت سارايىندا وتكەن ونەر كەشى ەلىمىزدىڭ ىشكى ىستەر ورگاندارىنىڭ 25 جىلدىق بەلەسىنە ارنالدى.

داستۇرگە اينالعان «اسكەري كەرنەي» فەستيۆالى بيىل التىنشى مارتە ءوز جالاۋىن كوتەرىپ، وعان ەلىمىزدىڭ ماڭداي الدى اسكەري وركەسترلەرىمەن بىرگە كورشى قىتاي مەن رەسەيدىڭ ۇزدىك اسكەري ونەر ۇجىمدارى قاتىستى. اتاپ ايتار بولساق،  بايقاۋعا ىرىكتەۋ سىندارىنان سۇرىنبەي وتكەن قازاقستان رەسپۋبليكاسى ۇلتتىق ۇلانىنىڭ ۇزدىك دەگەن اسكەري وركەسترلەرى ونەر كورسەتتى. ولاردىڭ قاتارىندا ۇلتتىق ۇلاننىڭ ۇلگىلىك كورسەتىمدى وركەسترى، اسكەري ينستيتۋتتىڭ اسكەري وركەسترى، ۇلتتىق ۇلاننىڭ «وڭتۇستىك»، «ورتالىق»، «باتىس» جانە «شىعىس» وڭىرلىك قولباسشىلىقتارىنىڭ اسكەري وركەسترلەرى بار.

سونىمەن بىرگە فەستيۆالدىڭ اقتىق ونەر كەشىندە مەملەكەتتىك كۇزەت قىزمەتىنىڭ (پرەزيدەنتتىك وركەستر) اسكەري وركەسترى مەن قۇرمەت قاراۋىل روتاسى، ۇقك شەكارا قىزمەتىنىڭ بىرلەسكەن وركەسترى جانە قر قورعانىس مينيسترلىگىنىڭ ورتالىق وركەسترى قاتىستى. ونەر دوداسىنىڭ كوركىن شەت ەلدەردەن كەلگەن رەسەي فەدەراتسياسى ۇلتتىق ۇلانى اسكەرى ورال وكرۋگى شتابىنىڭ اسكەري وركەسترى مەن قىتاي حالىق رەسپۋبليكاسى حالىقتىق قارۋلى پوليتسياسىنىڭ وركەسترى قىزدىردى.

وتانسۇيگىشتىك پەن ۇرپاقتار ساباقتاستىعى رۋحىندا ورىلگەن پلاتس-كونتسەرت «ەكسپو-2017» حالىقارالىق كورمەسى ءىس-شارالارى اياسىندا وتكىزىلىپ، ونداعى كلاسسيكالىق، حالىقتىق جانە ەسترادالىق مۋزىكالىق تۋىندىلارمەن قاتار، جاۋىنگەرلىك پاراد-دەفيلە، اسكەري-قىزمەتشىلەردىڭ قارۋ-جاراقپەن كورسەتىلگەن تانىمدىق كورسەتىلىمدەرى استانا جانە ونىڭ قوناقتارى ءۇشىن بىردەن-ءبىر ەستە قالارلىقتاي جارقىن اسەر قالدىردى.

اسىرەسە، جۇرتشىلىقتى پرەزيدەنتتىك وركەستر مەن ۇلتتىق ۇلان ۇلگىلىك كورسەتىمدى وركەسترى ورىنداعان تۋىندىلار ەرەكشە ءتانتى ەتتى. ەلىمىزدىڭ ەڭبەك سىڭىرگەن قايراتكەرى تىلەك ەرعاليەۆ جەتەكشىلىك ەتەتىن پرەزيدەنتتىك-ۇرمەلى وركەستر ماسكەۋدە وتەتىن ايگىلى حالىقارالىق «سپاسسكايا باشنيا» فەستيۆالىنىڭ تۇراقتى قاتىسۋشىسى. ونىمەن بىرگە ونەر ۇجىمى قازاقستاندى ءتۇرلى الەمدىك بايقاۋلاردا ابىرويمەن تانىتىپ ءجۇر. بۇل كەشتە دە ونەرپازدار تاماشا شوۋ ۇيىمداستىرا ءبىلىپ، كورەرمەندى قۋانىشقا بولەي ءبىلدى.

رەسەيدىڭ ەڭبەك سىڭىرگەن ءارتىسى پودپولكوۆنيك ۆالەري بەليكوۆ ديريجەرلىك ەتەتىن ەكاتەرينبۋرگ قالاسىنان كەلگەن ۇلتتىق ۇلان اسكەرى ورال وكرۋگى شتابىنىڭ وركەسترى دە قالىڭ قاۋىمعا كوتەرىڭكى كوڭىل-كۇي سىيلاي ءبىلدى. كاسىبي دەڭگەيدە ورىندالعان تۋىندىلار كورەرمەننىڭ جۇرەگىنە ءدوپ ءتيىپ جاتتى. قازاق ەلىنە قۇرمەت رەتىندە ونەر ۇجىمى ابايدىڭ «كوزىمنىڭ قاراسى» مەن «ناۋرىز» اۋەنىن دومبىرامەن سۇيەمەلدەي ورىنداپ، كەشكە جينالعان جۇرتشىلىقتىڭ ەرەكشە ىقىلاسىن تۋعىزا ءبىلدى.

قىتايلىق لي سىچەن جەتەكشىلىك ەتەتىن حالىقتىق قارۋلى پوليتسياسىنىڭ «زاششيتنيك» وركەسترى وسىمەن ەكىنشى رەت ۇلتتىق ۇلان باس قولباسشىسىنىڭ جۇلدەلەرى ءۇشىن وتكەن حالىقارلىق فەستيۆالعا قاتىستى. قۇرامىندا دارىندى دا شەبەر ورىنداۋشىلارى بار مۋزىكانتشىلار وسى جولى دا بار ونەرلەرىن ورتاعا سالدى. قىتايلىق كومپوزيتورلاردىڭ تۋىندىلارىن ورىنداعان وركەستر جينالعان قاۋىمدى اسپان استى ەلىنىڭ مادەنيەتىمەن ءتانتى ەتتى.

كەش بارىسىندا 150 ادامنان قۇرالعان ۇلاندىق جاۋىنگەرلەر ىشكى ىستەر ورگاندارىنىڭ 25 جىلدىعىنا تارتۋ رەتىندە «ءىىم»، «25»، «ۇۇ»، «KZ» ارىپتەرى مەن ساندارىن سالىپ، ۇلتتىق ۇلان ءان-بي ءانسامبلىنىڭ سوليستەرى «پوليتسيا قىرانىمىز» جانە «ۇلاندار» اتتى ۇلتتىق ۇلان گيمنىن ورىندادى.

ال قىتايلىق، رەسەيلىك جانە ۇلتتىق ۇلاننىڭ ۇلگىلىك كورسەتىمدى وركەسترى بىرلەسە ورىنداعان «درۋجبا» اۋەنى ءۇش ەل اراسىنداعى ىنتىماقتاستىقتىڭ مىزعىماس ەكەندىگىن اسپەتتەگەندەي بولدى. سالتاناتتى كەش فەستيۆالعا قاتىسقان بارشا وركەسترلەردىڭ ورىنداۋىنداعى «قازاق ەلى» انىمەن اياقتالدى.

فەستيۆال قورىتىندىسى بويىنشا ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ ءوز اتىنان ارنايى سىيلىقتار مەن ديپلومداردى رەسەي، قىتاي، ەلىمىزدىڭ پرەزيدەنتتىك وركەسترى، قورعانىس مينيسترلىگىنىڭ ورتالىق وركەسترى جانە ۇقك شەكارا قىزمەتىنىڭ بىرلەسكەن وركەسترلەرىنىڭ جەتەكشىلەرىنە تارتۋ ەتتى.

“The Qazaq Times”