ەپيدكارتادا ەڭ قاتەرلى «قىزىل ايماقتان» تۇسپەي تۇرعان استانا مەن الماتى قالالارىندا ىندەت دەندەپ تۇر. حالقى مەن جەدەل جاردەم قىزمەتىنىڭ جۇكتەمەسى الدەقايدا كوپ الماتى قالاسىندا تىركەلگەن ناۋقاستار سانى استاناعا قاراعاندا ەلەۋلى دەڭگەيدە از.
ەلوردادا ۇدەگەن دەرتتىڭ سەبەبىنەن كۇندىزگى ستاتسيونارلار مەن جوسپارلى ەمدەلۋ رەجيمى جۇمىسىن ۋاقىتشا توقتاتىپ، كوۆيدتىك اۋرۋحانا رەتىندە قايتا بەيىمدەلىپ جاتىر. بۇل جونىندە استانانىڭ قوعامدىق دەنساۋلىق ساقتاۋ باسقارماسى باسشىسى تيمۋر مۇراتوۆ جەتكىزدى.
«اۋرۋشاڭدىقتىڭ ارتۋىنا بايلانىستى قالالىق اۋرۋحانالاردى قايتا بەيىندەۋگە جانە كۇندىزگى ستاتسيوناردىڭ جۇمىسىن، جوسپارلى اۋرۋحاناعا جاتقىزۋدى توقتاتا تۇرۋعا تۋرا كەلەدى. وسىلايشا، باسقا مەديتسينالىق كلينيكالارعا ءتۇرلى باعىتتا جۇگىنەتىندەر كوبەيۋى مۇمكىن. ءبىز توسەك-ورىنداردى كوبەيتۋگە، قولدا بار بارلىق رەسۋرستى پايدالانۋعا ءماجبۇرمىز»، − دەدى مۇراتوۆ.
قازىرگى كەزدە ەلورداداعى 16 ستاتسيوناردا 3562 توسەك دايىندالعان. سونىڭ 72%-ى، ياعني 2556 ورنى تولعان، 1006 ورىن ازىرگە بوس. 262 كىسىلىك جانساقتاۋ بولىمىندە 230 ناۋقاس ەمدەلىپ جاتىر. 47 ادام وكپەنى جاساندى جەلدەتۋ اپپاراتىنىڭ كومەگىمەن تىنىستاۋدا. سونىمەن قوسا، قازىر 10,6 مىڭ ادام امبۋلاتورلىق باقىلاۋدا.
مۇراتوۆ ادامداردىڭ ءوز بەتىنشە ەمدەلگەندىكتەن اۋرۋحاناعا اۋىر جاعدايدا ءتۇسىپ جاتقانىن ايتادى. ونىڭ سوزىنشە، «مەديتسينالىق كومەككە ۋاقتىلى جۇگىنبەي، ءۇي جاعدايىندا انتيكواگۋليانتتار قولدانعان پاتسيەنتتەردىڭ تۇگەل دەرلىگى رەانيماتسياعا ءتۇسىپ جاتىر».
جەدەل جاردەم قىزمەتىنىڭ جۇكتەمەسى ارتقان: كۇنىنە 4 مىڭعا تارتا قوڭىراۋ ءتۇسىپ، ءموبيلدى بريگادالار 2 مىڭ شاقىرتۋعا بارادى. ال الماتى قالاسىندا ماماندار تاۋلىگىنە 6 مىڭنان اسا ءوتىنىش كەلىپ، 3 مىڭداي شاقىرتۋعا شىعادى. ءبىر قىزىعى، استانادا قوڭىراۋ الماتىعا قاراعاندا ەداۋىر از بولعانىمەن، انىقتالعان ناۋقاستار قاتارى ايتارلىقتاي كوپ.
الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە تىركەلگەن 993 ادامنىڭ 901-ىندە سيمپتوم بەلگىلەرى بار، تاعى 92 ادام سيمپتومسىز تۇردە اۋىرعان. 21 شىلدەدە 402 ادام اۋرۋحاناعا جاتقىزىلعان.
– جالپى قالادا 2516 ادام امبۋلاتورلىق دەڭگەيدە ەمدەلۋدە جانە سىيىمدىلىعى 6090 ورىن بولاتىن ينفەكتسيالىق ستاتسيونارلاردا 3099 ادام ەمدەلىپ جاتىر. جۇكتەمە ازىرگە 51% شاماسىندا. ولاردىڭ اراسىندا 173 بالا بار. ال رەانيماتسيا جانە قارقىندى تەراپيا بولىمدەرىندە 228 ناۋقاس بار. 25 ادام ءوجج، 78 ناۋقاس ءينۆازيۆتى ەمەس ءوجج-ىمەن جانە 86 سىرقات High flow اپپاراتىمەن دەم الۋدا. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 5821 ناۋقاس باقىلاۋعا الىنعان، – دەلىنگەن رەسمي حابارلامادا.
رەسمي دەرەككە سايكەس، جالپىحالىقتىق ۆاكتسيناتسيالاۋ ناۋقانى باستالعالى، ياعني اقپان ايىنان بەرى استانادا 206 مىڭ، ال الماتىدا 415 مىڭ ادام ەكپەنىڭ تولىق دوزاسىن سالدىرعان. ساراپشىلار ولاردىڭ اراسىندا جالعان پاسپورت جاساتقاندار بولۋى ابدەن مۇمكىن ەكەنىن ەسكەرگەن ءجون دەيدى.
پاندەميا كەزىندە كوروناۆيرۋس پەن پنەۆمونيا سىرقاتتارىنىڭ قاتارى ءتورتىنشى تولقىندا استانادا 94 مىڭعا (81 مىڭى كۆي+, 6 مىڭى كۆي-) جەتسە، الماتىدا 93 مىڭعا (86 مىڭى كۆي+, 6 مىڭى كۆي-) جۋىقتادى.
بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 510 مىڭعا، 1 تامىزدان بىلايعى كوروناۆيرۋس پنەۆمونياسى 59 مىڭعا جۋىقتادى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 569 مىڭعا شامالادى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردان 11 122 ادام (كۆي+ / U07.1 – 5180, كۆي- / U07.2 – 3575, ىلەسپە اۋرۋلاردان – 2367) قايتىس بولعان. وسىلايشا، قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 42-ورىندا تۇر.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟