فوتو: Forbes

ۇلتتىق ەكونوميكا مينيسترلىگى بيزنەس تاراپىنان مەملەكەتتىك ورگاندارعا ۇسىنىلاتىن ءجونسىز جانە قايتالانعان ەسەپتەردى انىقتاۋ جانە قىسقارتۋ بويىنشا زاڭنامانى كەڭ اۋقىمدى تەكسەرۋدى جۇرگىزەدى، دەپ حابارلايدى مينيسترلىكتىڭ ءباسپاسوز قىزمەتى. 

«بۇگىندە بيزنەس بەرەتىن ەسەپتىڭ 1200-دەن اسا ءتۇرى انىقتالدى. سونىمەن قاتار سوناۋ 2000-جىلداردىڭ باسىندا ەنگىزىلگەن، ال مەملەكەتتىك ورگانداردىڭ وزىنە ولاردىڭ قاجەت ەكەنى تۇسىنىكسىز بىرقاتار ەسەپ تۇرلەرىنىڭ بار ەكەنى انىقتالدى. ناتيجەسىندە بۇلاردىڭ ءبارى بيزنەسكە اۋىرتپالىق بولىپ تابىلادى»، - دەدى قر ۇەم كاسىپكەرلىكتى دامىتۋ دەپارتامەنتى ديرەكتورىنىڭ ورىنباسارى اسلانبەك جاقىپوۆ.

رەفورمالاندىرۋدىڭ قورىتىندىسى ولاردىڭ قولدانىلۋىن رەتكە كەلتىرۋ، بيزنەس بەرەتىن ەسەپتىلىكتىڭ قايتالانۋىن بولدىرماۋ جانە سوعان سايكەس كاسىپكەرلەردىڭ شىعىندارىن قىسقارتۋ بولۋى ءتيىس.

ۇلتتىق ەكونوميكا مينيسترلىگى مەملەكەتتىك ورگاندارعا بەرىلەتىن ەسەپ تۇرلەرىنىڭ بىرىڭعاي جانە مەيلىنشە تولىق تىزبەسىن قۇرۋدى جوسپارلاپ وتىر. ەشبىر مەملەكەتتىك ورگاننىڭ كاسىپكەردەن وسى تىزبەدە قاراستىرىلماعان قانداي دا ءبىر اقپاراتتى نەمەسە ەسەپتى سۇراتۋعا قۇقىعى بولمايدى.

سودان كەيىن بەكىتىلگەن تىزبەگە ەسەپتىلىكتىڭ جاڭا ءتۇرىن كىرگىزۋ ماسەلەسى مىندەتتى تۇردە تەك ونىڭ دالەلدىلىگى جانە ماقساتتىلىعىن ايقىندايتىن رەتتەۋشىلىك اسەر ەتەتىن تالداۋ راسىمدەۋلەرىنەن وتكەننەن سوڭ عانا جۇزەگە اسىرىلادى.

“The Qazaq Times”