فوتو: Vلاست

2017 جىلدىڭ 5 ايىندا جەرگىلىكتى اتقارۋ ورگاندار شەتەلدىك جۇمىس كۇشىن تارتۋ ءۇشىن 3 813 جۇمىس بەرۋشىگە 10 658 رۇقسات قۇجاتىن بەرىپ، جارامدىلىق مەرزىمىن ۇزارتتى. قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى مينيسترلىكتىڭ ءباسپاسوز قىزمەتى. 

“ولار 3,2 ملرد تەڭگە كولەمىندە سالىق تولەدى. 2017 جىلدىڭ باسىندا ەل بويىنشا شەتەلدىك جۇمىس كۇشىن تارتۋعا 29,3 مىڭ رۇقسات بەرۋ كۇشىندە بولسا، ونىڭ 23,1 مىڭىن 1-3 ساناتتارداعى جۇمىسشىلار قۇرادى. 545 ادام كورپوراتيۆتىك اۋىسۋ اياسىندا جۇمىلدىرىلدى", - دەدى مينيستر.

ءمينيستردىڭ سوزىنشە، 2017 جىلدىڭ 1 مامىرىندا 28,5 مىڭ رۇقسات بەرىلسە، ونىڭ 77%-ى 1-3 ساناتتاعى ماماندارعا تابىستالدى. شەتەلدىك جۇمىس كۇشىن تارتقان 3 768 كاسىپورىندا 470,4 مىڭ قازاقستاندىق ازامات ىستەيدى، بۇل جۇمىسشىلاردىڭ جالپى سانىنىڭ 94%-ىن قۇرايدى ەكەن.

سونداي-اق، 2016 جىلى شەتەلدىك جۇمىس كۇشىن تارتقان جۇمىس بەرۋشىلەر قازاقستاندىق ازاماتتار ءۇشىن 16 259 جۇمىس ورنىن قامتاماسىز ەتكەن. وتكەن جىل بويى 1 091 جۇمىسشى كاسىبي قايتا دايارلىقتان وتسە، 5427 جەرگىلىكتى جۇمىسشى بىلىكتىلىگىن كوتەرىپ، 249 قازاقستاندىق ەڭبەككەر كاسىبي كاسىبي شەبەرلىگىن شىڭداعان.

مينيسترلىكتىڭ مالىمەتىنشە، قازاقستانعا كەلەتىن شەتەلدىك ماماندار، 3 ايلىق ءتيىستى  انىقتاما نەگىزىندە بىلىكتىلىككە ساي كەز-كەلگەن جۇمىس ورنىنا، ەكونوميكانىڭ باسىم سالالارىندا سۇرانىسقا يە كاسىپتەر تىزبەسىندە كورسەتىلگەن ماماندىقتار تۇرعىسىندا ءوز بەتىمەن جۇمىسقا تۇرۋ مۇمكىندىگىن يەلەنۋدە. شەتەلدىك مامان ءبىلىمىن، جۇمىس ءوتىلىن، تاجىريبەسىن جانە وزگە دە بىلىكتىلىگىن دالەلدەيتىن شارتتار شەڭبەرىندە ارنايى جۇيەگە لايىق ۇپاي جينايدى.

جاڭا جەڭىلدەتىلگەن شەتەلدىك جۇمىس كۇشىن تارتۋ تارتىبىندە جۇمىس رۇقساتتارىن بەرۋ مەرزىمى قىسقارتىلىپ، اكىمشىلىك تالاپتار الىنىپ تاستالدى. ەسكى قاعيداتتاردىڭ ورنىنا جۇمىس بەرۋشى سالىق الىمدارىن تولەۋى ءتيىس.

“The Qazaq Times”