قىتاي شەتەلدىك بىلىكتى مامانداردى 10 جىلدىق ۆيزا بەرىپ ەلىنە تارتۋدا

قىتاي شەتەلدىك ءىرى تابىسكەرلەرگە جانە عالىمدارعا ۇزاق مەرزىمدى ۆيزا بەرەتىنىن جاريالادى. ۇزاق مەرزىمدى ۆيزا عالىمدارعا، كاسىپكەرلەرگە جانە تەحنولوگيا ءوندىرۋشى كاسىپورىن جەتەكشىلەرىنە قاراتىلعان. بۇل تۋرالى سول «People» باسىلىمىنىڭ رەسمي سايتى حابارلادى.

اتالعان باسىلىمنىڭ حابارىنا قاراعاندا، رەسمي بەيجىڭ بيلىگى ءتۇرلى سالاداعى ءىرى كاسىپكەرلەردى، تەحنولوگيا وندىرۋشىلەردى جانە جوعارى دارەجەلى ماماندار مەن عالىمداردى  ەلگە تارتۋ ماقساتىندا، سونداي-اق، ەل ەكونوميكاسىنىڭ دامۋىنا ۇلەس قوسۋعا مۇمكىندىك بەرۋ ءۇشىن 5 جىلدىق جانە 10 جىلدىق ۆيزالار بەرەتىنى ايتىلعان.

اتالعان تۇلعالار بۇنداي ۆيزالاردى ونلاين ءارى تەگىن ءوتىنىش بەرۋ ارقىلى الا الادى. ۇزاق مەرزىمدى ۆيزانى العان ادام ءبىر رەتتە قىتايدا 180 كۇن تۇرا الادى جانە وتباسى مۇشەلەرىن دە اكەلە الادى.

قىتاي شەتەلدىك تابىسكەر تۇلعالاردى ەلگە تارتۋ ساياساتىن وسىدان ەكى جىل بۇرىن جولعا قويعان. قىتايدىڭ بۇل باعدارلاماسىنا نوبەل سىيلىعىنىڭ يەگەرلەرىن، عالىمداردى، ناتيجەگە جەتكەن سپورتشىلاردى، بىلىكتى ۋنيۆەرسيتەت وقىتۋشىلارى جانە قارجى ماماندارى دا كىرەدى.

قىتايدىڭ بۇل باعدارلامانى جولعا قويۋداعى سەبەپ – الەمنىڭ ەكىنشى ءىرى ەكونوميكاسىن ۇستاپ تۇرۋ جانە دامىتۋعا قىتايدىڭ  وزىندىك تاجريبەسى جەتكىلىكسىز، وعان قوسا ەكونوميكاسى دامىعان قىتايدىڭ قوعامدىق سالالارىندا كەنجە قالعان تۇستارى از ەمەس. بۇل تۇرعىدا قۇراما شتات پەن ۇلىبريتانيانىڭ تاجريبەسى قىتايعا اۋاداي قاجەت.

“The Qazaq Times”