قازاقستان مەن قىتاي اراسىندا قۇنى 7 ملرد دوللاردى قۇرايتىن 22 كەلىسىمگە قول قويىلادى. بۇل تۋرالى قازاقستان-قىتاي ىسكەرلىك كەڭەسىنىڭ (ققىك) ءتورتىنشى وتىرىسىندا "سامۇرىق-قازىنا" اق باسقارما توراعاسى جانە كەڭەستىڭ قوسىمشا توراعاسى ومىرزاق شوكەەۆ مالىمدەدى.

"بۇگىن قازاقستان-قىتاي ىسكەرلىك كەڭەسىنىڭ وتىرىسى اياسىندا كومپانيالار قۇنى 7 ملرد دوللار بولاتىن 22 كەلىسىمگە قول قويادى", - دەدى ومىرزاق شوكەەۆ ققىك-ءنىڭ پلەنارلى وتىرىسىندا.

ونىڭ سوزىنشە، دايىندالعان قۇجاتتاردىڭ اراسىندا قىتايدىڭ مەلمەكەتتىك دامۋ بانكى ارقىلى 3 ملرد دوللار كولەمىندە جەڭىلدەتىلگەن شارتپەن كرەديت بەرۋ تۋرالى كەلىسىم بار.

سونداي-اق، ونىڭ ايتۋىنشا، اتىراۋ وبلىسىندا مەتانول جانە اممياكتى اۋقىمدى ءوندىرۋ جوباسى ءۇشىن قازاقستانعا $ 1 ملرد بەرۋ تۋرالى كەلىسىمگە قول قويىلادى.

"سامۇرىق-قازىنا" اق باسشىسىنىڭ سوزىنشە، ىسكەرلىك كەڭەس وسىدان ءتورت جىل بۇرىن قر پرەزيدەنتى نۇرسۇلتان نازارباەۆتىڭ قىتايعا ساپارى كەزىندە قۇرىلعان. "وسى ۋاقىت ارالىعىندا كەڭەس ءوزىنىڭ تيىمدىلىگىن كورسەتتى. قازىرگى كەزدە قازاقستان-قىتاي ينۆەستيتسيالىق پورتفەلىندە جالپى قۇنى 28 ملرد دوللاردى قۇرايتىن 51 جوبا بار", - دەيدى شوكەەۆ.

شوكەەۆتىڭ ايتۋىنشا، بۇل جوبالار  مۇناي-گاز، حيميا، ەنەرگەتيكا، كولىك، اۋىل شارۋاشىلىعى، تاۋ-كەن جانە مەتالدار مەن ينجەنەرلىك سەكتورلارىن قامتيدى. ياعني قارجى وسى سالالارعا جۇمسالادى. سونداي-اق، قىتايلىق ينۆەستيتسيا "سامۇرىق-قازىنا" كومپانيالار توبىنىڭ 14جوباسىنا جۇمسالادى.

“The Qazaq Times”