اراب ەلدەرىنىڭ اراسىنداعى جانجال نەمەسە اقش-تىڭ ارانداتۋى

باحرەين، ساۋد ارابياسى، ەگيپەت جانە ءباا كاتارمەن ديپلوماتيالىق قاتىناستارىن ءۇزدى.

كاتارمەن ساياسي-ديپلوماتيالىق بايلانىسىن ءۇزۋ تۋرالى شەشىمدى العاش باحرەين كورولدىگى مالىمدەگەن بولاتىن. ەلدىڭ رەسمي اگەنتتىگىنىڭ جاريالاعان حابارلاماسىنا سايكەس مانامانىڭ بۇل قادامعا بارۋىنا دوحانىڭ باحرەين كورولدىگىندەگى قاۋىپسىزدىك جاعدايى جانە تۇراقتىلىققا قاۋىپ ءتوندىرىپ، ەلدىڭ ىشكى ساياساتىنا دا ىقپال ەتكەندىگىن، باق-تاعى ارانداتۋشىلىق پەن تەرروريستىك توپتارعا قالداۋ كورسەتكەندىگى سەبەپ بولىپ وتىر.

باحرەين كاتارلىق ديپلوماتتارعا كورولدىكتىڭ ايماعىنان كەتۋگە 8 ساعات بەرگەن بولاتىن.

سونىمەن قاتار، ماناما دوحامەن بارلىق اۋە جانە تەڭىز قاتىناستارىن ۇزە وتىرىپ، كاتاردىڭ جانە ەلدىڭ ازاماتتارىنا كاتارعا بارۋعا تىيىم سالعان.

باحرەين وسى مالىمدەمەنى جاساعانىنا بىرنەشە مينۋتتار وتكەننەن كەيىن وسى سەكىلدى شەشىمدەردى ەر-ريادا، كاير جانە ابۋ-دابي قابىلدادى.

ساۋد ارابياسى جانە ەگيپەت تە كورشى مەملەكەتپەن قۇرلىق، اۋە جانە تەڭىز بايلانىستارىن ءۇزىپ وتىر.

ەگيپەتتىڭ ءسىم رەسمي مالىمدەمەسىندە: «ەگيپەت رەسپۋبليكاسىنىڭ ۇكىمەتى كاتار بيلىگىنىڭ بىزگە قاتىستى دۇشپاندىق قىلىق تانىتقانى ءۇشىن بارلىق ديپلوماتيالىق قارىم-قاتىناستى ءۇزۋ تۋرالى شەشىم قابىلدادى» - دەلىنگەن.

ءباا دوحانى «مۇسىلمان باۋىرلار» باستاعان لاڭكەستىك، ەكسترەميستىك جانە كونفەسسياارالىق توپتاردى قولداپ، قارجىلاندىرىپ وتىر دەپ كىنالاۋدا.

ءوز كەزەگىندە ساۋد ارابياسى باستاعان اراب كوالياسى كاتاردىڭ «ءال-كايدا» مەن «يسلام مەملەكەتى» ۇيىمدارىن زاڭسىز قولداعانى ءۇشىن يەمەندەگى اسكەري وپەراتسياعا قاتىسپايتىندىعىن ايتىپ وتىر.

كاتار مەن كورشىلەرىنىڭ اراسىنداعى جانجال ەر-رياداداعى پارسى شىعاناعى ەلدەرى مەن اقش-تىڭ قاتىسۋىمەن وتكەن سامميتتەن كەيىن باستالعان بولاتىن. كاتاردىڭ اقپاراتتىق اگەنتتىگى ءامىردىڭ اتىنان يرانمەن قارىم-قاتىناستى جاقسارتۋ تۋرالى ءسوزىن جاريالاعان. بىراق كەزدەسۋدە ساۋد ارابياسىنىڭ بيلىگى بارلىق قوناقتاردىڭ اتىنان تەگەراندى «دۇشپاندىق ساياساتى» ءۇشىن كىنالاپ، ءتيىستى جاۋاپ قايتارىلاتىندىعىن مالىمدەگەن.

كەيىن كاتاردىڭ سىرتقى ىستەر ءمينيسترىنىڭ رەسمي وكىلى اگەنتتىكتىڭ سايتىن حاكەرلەر بۇزىپ، ءامىردىڭ ءسوزىن دە سولار جۇكتەگەنىن حابارلاعان. بىراق ساۋد ارابياسى، ءباا جانە باحرەين كاتاردىڭ بۇل مالىمدەمىسىن نەگىزسىز دەپ تاۋىپ، يرانعا قاتىستى ايتىلعاندار شىنىمەن ءامىردىڭ ءسوزى بولۋى مۇمكىن ەكەنىن جەتكىزگەن.

ءباا سىرتقى ىستەر ءمينيسترى انۆار گارگاش كاتارعا كورشىلەرىمەن بايلانىسىن قالپىنا كەلتىرۋ ءۇشىن ساياساتىن وزگەرتىپ، بۇرىنعى قاتەلىكتەرىن قايتالاماۋعا كەڭەس بەردى.

“The Qazaq Times”