قىتاي ۇلتتىق كومپانياسىنىڭ بۇرىنعى باسشىسى دىڭ چيليگە پارا العانى ءۇشىن 15 جىلدىق قاماق جازاسى بەرىلدى. فوتو: The Wall Street Journal.

قىتايدىڭ ەڭ جوعارى سوتى وسى اپتادا جوعارى دارەجەلى لاۋازىمدىلاردىڭ سىبايلاس جەمقورلىق ىسىنە قاتىستى اشىق سوت وتىرىسىن وتكىزدى. ءبىر رەتتە مۇنشالىقتى كوپ ءارى شەنى جوعارى تۇلعالارعا جازا كەسۋ قىتايدىڭ جانە الەمنىڭ سوت ءىسى تاريحىندا دا تىم سيرەك كەزدەسەدى. جازا كەسىلگەندەردىڭ سانى مەن ولاردىڭ لاۋازىمدارىنىڭ جوعارىلىعىنا قاراپ-اق، قىتاي ۇكىمەتىنىڭ جەمقورلىقپەن كۇرەستەگى تەبىنىن اڭعارۋعا بولادى. بۇل تۋرالى وسىدان ءبىر كۇن بۇرىن امەريكالىق تانىمال باسىلىم “The Wall Street Journal” حابارلاعان بولاتىن.

قىتايلىق رەسمي باق-تىڭ حابارلاۋىنشا، سارسەنبى كۇنى قىتاي ەڭ جوعارى سوتى پروۆينتسيا باسشىلارىن قامتىعان لاۋازىمدى تۇلعالار، سونداي-اق، اعا لاۋازىمدى جانە ءىرى ۇلتتىق كومپانيالاردىڭ بۇرىنعى باسشىلارىنا جازا كەسكەن.

Wuhan Iron and Steel (ۋحان بولات-تەمىر گرۋپ.) كومپانياسىنىڭ بۇرىنعى پرەزيدەنتى دىڭ چيليڭگە پارا قابىلداۋ جانە وزگەلەرمەن سىبايلاستىق جاساۋ ايىبىمەن 15 جىلدىق قاماق جازاسىن بەردى.

China Telecom-نىڭ باستىعى چاڭ مياۋبيڭدى پارا العانى ءۇشىن التى جىلعا قاماق جازاسى بەرىلدى.

قىتاي ۇلتتىق ستاتيستيكا بيۋروسىنىڭ بۇرىنعى باسشىسى ۋاڭ باۋاندى ومىرلىك باس بوستاندىعىنان ايىرۋ ۇكىمى جاريالاندى.

بەيسەنبى كۇنى قىتاي Resources Group بۇرىنعى باسشىسى دا پاراقورلىق ءىسى جانە الەۋمەتتىك مۇلىكتى يەمدەنگەنى ءۇشىن 14 جىلعا باس بوستاندىعىنان ايىردى.

جوعارى لاۋازىمدىلاردىڭ سىبايلاس جەمقورلىققا بايلانىستى سوت وتىرىسى تۇگەلدەي اشىق تۇردە وتكىزىلگەن. ولاردىڭ اراسىندا بۇرىنعى ۇكىمەتتىڭ جوعارى دارەجەلى شەندىلەرى مەن پروۆينتسيالاردىڭ باسشىلارى دا بار.

وزگە ەلدىڭ ساراپشىلاردىڭ ايتۋىنشا، ءبىر كۇن ىشىندە سونشاما كوپ جوعارى لاۋازىمدىلارعا جازا كەسۋ، قىتاي ۇكىمەتىنىڭ جەمقورلىقتى الاستاۋعا شىنداپ كىرىسىپ وتىرعانىن انىق ايگىلەيدى. ءارى، جەمقورلىقپەن ۇستالعان تۇلعالاردىڭ قوعامدىق-ساياسي لاۋازىمدارىنا قاراماستان، قاتاڭ جازاعا تارتىپ وتىر. ال،  سول ەلدىڭ ساراپشىلارى سىبايلاس جەمقورلىققا قارسى باتىل كۇرەس – قازىرگى قىتاي باسشىسى شي جينپيڭنىڭ قول جەتكىزگەن بيىك ناتيجەسىنىڭ ءبىرى دەپ باعالايدى.

قىتاي مەملەكەتتىك ساياسي ينستيتۋتىنىڭ پروفەسسورى جۋ ليجيا بۇل تۋرالى: «شي ءجينپيڭنىڭ ءبىرىنشى وكىلەتتىك مەرزىمى اياقتاماي تۇرىپ-اق، قىتاي ۇكىمەتى سىبايلاس جەمقورلىققا قارسى كۇرەستە جوعارى ناتيجەگە جەتتى. ال، الداعى بىرنەشە ايدا جەمقورلىققا قارسى وزگە دە سىناق جوبالارى جەدەلدەتىلە تۇسەدى»، – دەگەن پىكىرىن ايتتى.

“The Qazaq Times”