اقش پەن قىتاي باسشىلارى كەلەر اپتادا ونلاين ديالوگ وتكىزۋى مۇمكىن.

«قاتاڭ باسەكەلەستىك قارىم-قاتىناستاعى» اقش پەن قىتاي باسشىلارى كەلەسى اپتادا بەينە كەزدەسۋ وتكىزەدى دەپ كۇتىلۋدە. ونلاين سامميت تۋرالى اق ءۇيدىڭ رەسمي مالىمدەمەسىندە دەرجەۆالار اراسىنداعى «قاتاڭ باسەكەلەستىك قاتىناستى» «جاۋاپكەرشىلىكپەن بىرجاقتى ەتۋ» ءۇشىن اتالعان ءسامميتتىڭ اسا ماڭىزدى ەكەنىن اتاپ وتكەن.

اقش پرەزيدەنتى جوۋ بايدەن مەن قىتاي باسشىسى شي جينپيڭ (سي تسزينپين) ورتاسىنداعى ونلاين جۇزدەسۋ تۋرالى ەكى ەل رەسمي مالىمدەمە جاساعان جوق. تەك وسىدان بۇرىن ونلاين سامميت تۋرالى  بەيجىڭ تارابى «قايشىلىقتاردى دۇرىس باسقارۋ» ءۇشىن ۋاشينگتونمەن جۇمىس ىستەۋگە دايىن ەكەنىن ايتقان بولاتىن.

«رەيتەر» مەن Bloomberg وزدەرىنىڭ ەڭ سەنىمدى دەگەن دەرەككوزدەرىنە سىلتەمە جاساي وتىرىپ، تاراپتار مۇمكىندىگىنشە تەزىرەك ديالوگ وتكىزۋگە تىرىسىپ جاتقانىن، دەگەنمەن ونلاين كەزدەسۋدىڭ ناقتى ۋاقىتى ءالى تۇراقتانباعانىن ايتادى.

ەكى ەلدىڭ باسشىلارىنىڭ ونلاين ءسامميتىن وتكىزۋ ءۇشىن بەيجىڭ مەن ۋاشينگتوننىڭ بىرنەشە جوعارى لاۋازىمدىلارى بۇعان دەيىن دە ونلاين سويلەسۋلەردى وتكىزگەن. بىراق، ونىڭ ءبارى تاراپتار ورتاسىنداعى كۇردەلى قايشىلىقتاردى شەشىپ كەتە المادى.

سوڭعى ايلاردا تايۋان جانە شىڭجاڭ ماسەلەلەرى بويىنشا ۋاشينگون مەن بەيجىڭ اراسىنداعى قايشىلىقتى پىكىرلەر ءتىپتى دە تەرەڭدەي ءتۇستى. قىتايدىڭ تايۋانعا (تايۆانعا) اسكەري قىسىمىن جالعاستىرا بەرۋى، يادرولىق ارسەنالىن جىلدام كەڭەيتۋى جانە گيپەر دىبىستىق زىمىرانداردى سىناۋى كوپتەگەن ساراپشىلاردى ەكى الپاۋىت دەرجاۆا اراسىنداعى اپاتتى قاقتىعىسقا اكەلۋى مۇمكىن دەپ الاڭداتا باستاعانى ءمالىم.

وتكەن اپتادا اقش پرەزيدەنتى شوتلاندياداعى كليمات سامميتىنە قاتىسقان كەزدە جۋرناليستەردىڭ سۇراعىنا جاۋاپ بەرىپ، اقش-قىتاي اراسىندا قارۋلى قاقتىعىسقا باستايتىن پالەندەي ۇلكەن سەبەپ جوق ەكەنىن، بىراق كۇتپەگەن جەردەن قاقتىعىس بولىپ كەتۋىنەن الاڭدايتىنىن ايتقان بولاتىن.

بايدەن پرەزيدەنت بولعاننان بەرى قىتاي بەسشىسى شي جينپيڭمەن رەسمي كەزدەسۋ وتكىزگەن جوق. ونلاين كەزدەسۋدە بولعان ەمەس، تەك بىرنەشە رەت تەلەفون ارقىلى سويلەسكەنى بار. بايدەن گلازگوداعى سامميت كەزىندە وسى سويلەسۋلەر تۋرالى ايتىپ: «مەن بۇل باسەكەلەستىكتىڭ جانجالعا اينالۋىنا نەگىز جوق ەكەنىن كوپ رەت ايتتىم»، – دەگەن.

اقش پەن قىتاي قازىرگى كۇيدە تىكەلەي قارۋلى قاقتىعىستان بارىنشا ساقتاناتىنى انىق. دەگەنمەن، شيەلەنىستەر كۇشەيگەن سايىن كەيبىر سەزىمتال نۇكتەلەردەگى (ايتالىق، وڭتۇستىك قىتاي تەڭىزى، تايۋان بۇعازى سەكىلدى) كەزدەيسوق قاقتىعىستاردىڭ قاۋىپى جاقىنداپ كەلەدى. بەيجىڭ مەن ۋاشينگتون اراسىندا ەڭ جوعارى باسشىلار ورتاسىندا وسى قاقتىعىستاردىڭ الدىن الۋ ءۇشىن جانە ورتاداعى كەرەعارلىقتى تالقىلاۋ ءۇشىن قالايدا ديالوگ جۇرگىزەتىن كەزىنە كەلىپ قالدى. تاراپتاردىڭ ديالوگ وتكىزۋگە بارىنشا اسىققانىنا قاراي وتىرىپ ەكى ەل اراسىنداعى شيەلەنىستىڭ ءتىپتى دە قاۋىپكە قاراي بەت العانىن باعامداۋعا دا بولادى.

The Qazaq Times