فوتو: azh.kz

2016 جىلى تابيعاتتى پايدالانۋ جانە ەكولوگيا سالاسىندا  26 سىبايلاس جەمقورلىق قىلمىسى تىركەلگەن. ال 2017 جىلدىڭ 4 ايىنىڭ قورىتىندىسى ولاردىڭ سانى وتكەن جىلدىڭ العاشقى ايلارىنا قاراعاندا  3 ەسەگە ارتقان. مۇنداي دەرەكتەر قازاقستان رەسپۋبليكاسىنىڭ باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ مالىمەتەرىندە كەلتىرىلگەن.

قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقپاراتىنشا، قر ەنەرگەتيكا مينيسترلىگى جانە ونىڭ اۋماقتىق بولىمشەلەرىمەن 2016 جىلى قورشاعان ورتانى قورعاۋ سالاسىنداعى زاڭ بۇزۋشىلىق فاكتىلەرى بويىنشا 5610 اكىمشىلىك قۇقىق بۇزۋشىلىق تىركەلىپ، ولاردىڭ 92%-ىنا جالپى سوماسى 2 ملرد تەڭگەدەن استام ايىپپۇل سالىنعان.

ەڭ كوپ ايىپپۇل  كولەمى -  باتىس قازاقستان وبلىسىنا (578 ملن تەڭگە), اقتوبە وبلىسىنا (458 ملن تەڭگە)  جانە قاراعاندى وبلىسىنا ( 448 ملن تەڭگە) تيەسىلى.

ەنەرگەتيكا مينيسترلىگىنىڭ اقپاراتى بويىنشا 2016 جىلى باقىلاۋ-ينسپەكتسيالىق قىزمەتتىڭ ناتيجەسىندە قورشاعان ورتانى لاستاعانى ءۇشىن زاڭدى تۇلعالاردان جالپى سوماسى 25 ملرد تەڭگە ءوندىرىلدى، ال وسى جىلدىڭ باسىنان باستاپ-اق بۇل كورسەتكىش 20 ملرد تەڭگەدەن اسقان.

سونداي-اق، اگەنتتىكتىڭ ءباسپاسوز حابارلاماسىندا جازىلعان اقپاراتقا سۇيەنسەك، جىل سايىن پايدا بولاتىن 5-6 ملن توننا تۇرمىستىق-قاتتى قالدىقتاردىڭ تەك 1,8% قايتا وڭدەلەدى، ال قالعانى 100 ملن توننا كولەمىندەگى قالدىقتارعا قوسىلىپ، ارنايى پوليگونداردا جينالادى ەكەن.

“The Qazaq Times”