فوتو: Tengrinews

الماتىداعى اۆتوپاركتەر قوعامدىق كولىك جۇمىسىن رەتتەۋ ءۇشىن جەرگىلىكتى بيلىكتەن سۋبسيديا ءبولۋىن تالاپ ەتىپ وتىر. تاسىمالداۋشىلاردىڭ ايتۋىنشا، قر كاسىپكەرلىك كودەكسىنىڭ 124-4 بابىنىڭ 6 تارماعىنا سايكەس، ەگەر بەكىتىلگەن تاريف جولاۋشىلار تاسىمالىنا كەتكەن شىعىنداردى جاپپايتىن بولسا جەرگىلىكتى اتقارۋشى ورگاندار سۋبسيديا تولەۋ كەرەك ەكەن. مۇنداي مالىمەتتى Tengrinews.kz سايتى كەلتىرىپ وتىر.

ء"بىز سۋبسيديالاۋدى تالاپ ەتەمىز. بۇل زاڭ تالابى. بۇل ۇكىمەتتە بەكىتىلگەن نورما... الەۋمەتتىك ماڭىزى بار مارشرۋتتارعا مەملەكەت ءتاريفتى وزىندىك قۇنىنان تومەن بەلگىلەيدى. ءبىز مۇنى بىلەمىز. دەۆالۆاتسيا بولعانعا دەيىن كەيبىر مارشرۋتتارداعى تاريفتەر شىعىندى جاباتىن، ال قازىر ونداي جوق. بۇرىن اۆتوبۋستار 15 ملن تەڭگە تۇراتىن، ال قازىرگى باعاسى 30 ملن تەڭگە", - دەيدى "الماتى قالالىق جولاۋشىلاردى تاسىمالداۋ كاسىپورىندارىنىڭ قاۋىمداستىعى" زاڭدى تۇلعالار بىرلەستىگىنىڭ جەتەكشىسى ءسابيت امانباەۆ.

امانباەۆتىڭ مالىمەتىنشە، الماتى اكىمدىگى جانىنداعى كوميسسيا تاسىمالداۋشىلاردىڭ اۆتوبۋستارداعى جولاقىنىڭ وزىندىك قۇنى 149 تەڭگە بولاتىن ەسەبىن تەكسەرگەن. الايدا وسىعان قاراماستان بيلىك تاراپىنان اۆتوپاركتەردىڭ شىعىنىن جابۋعا ەشبىر امال قاراستىرىلماي وتىر.

"تاريفتىك كوميسسيا ءبىزدىڭ ء"ونىم" 149 تەڭگە بولاتىنىن ەسەپتەدى. بىراق ەشبىر ارەكەت جاساماي وتىر. ەگەر تاريف كوتەرىلسە قىزمەت كورسەتۋ مادەنيەتى، قوزعالىس كەستەسى جاقسارار ەدى. بىراق بىزگە ءار ترانزاكتسيا ءۇشىن 72 تەڭگە تولەيدى. ءبىز ءتاريفتىڭ كوتەرىلگەنىن سۇراپ وتىرعان جوقپىز! ول اكىمدىكتىڭ قۇزىرىندا. ولار باعانى تۇسىرسە دە، كوتەرسە دە، تەگىن جاساسا دا وزدەرى بىلەدى. بىراق جولاقىنىڭ وزىندىك قۇنى - 149 تەڭگە. ال سۋبسيديا بەرۋ - الەمدىك تاجىريبە. ەگەر مۇنى ىستەمەسە، كاسىپكەرلەر اۋادان اقشا جاسامايدى عوي. سودان كەيىن ۇنەمدەيمىز، لايىقتى جالاقى تولەنبەيدى، بولشەكتەر ساتىپ الىنبايدى، رەزينالار اۋىستىرىلمايدى، قىس مەزگىلىنە دە دۇرىس دايىن بولمايدى", - دەدى امانباەۆ.

سونداي-اق، ول اي سايىن تاسىمالداۋشىلار اراسىندا 1,4 ملرد تەڭگەگە جۋىق قارجى تاپشىلىعى بولاتىنىن ايتادى. ءتىپتى قازىرگى ۋاقىتتا تاسىمالداۋشىلاردىڭ كرەديتورلار الدىندا 103 ملرد تەڭگە قارىزى بار ەكەن.

ايتا كەتەيىك، الماتى قالاسىنىڭ 2017 جىلعا ارنالعان بيۋدجەتى 48,9 ملرد تەڭگە بولىپ بەكىتىلگەنى جانە ونىڭ 11,5 ملرد تەڭگەسى سەرۆيستىك قىزمەت كورسەتەتىن ىڭعايلى ءارى جاڭا 297 اۆتوبۋستار مەن كولىك تۇراعىنىڭ بارىنشا ءتيىمدى جۇمىس ىستەۋى ءۇشىن 40 ەۆاكۋاتور ساتىپ الۋعا جۇمسالاتىنى تۋرالى حابارلانعان بولاتىن.

“The Qazaq Times”