باۋىرجان بايبەك: الماتىدا جولاقى قىمباتتامايدى

الماتىدا تروللەيبۋس جانە اۆتوبۋستاردا جولاقى قىمباتتامايدى. بۇل تۋرالى الماتى قالاسىنىڭ اكىمى باۋىرجان بايبەك مالىمدەدى.

"قالا تۇرعىندارىنىڭ ەسەبىنەن وتەماقى، سۋبسيديا بولىنەدى، اۆتوبۋس پاركتەرىنىڭ 30 پايىزى جاڭاردى، 24 مارشرۋت ءتۇرى جاڭاردى، تۇرعىنداردىڭ ءوتىنىشى بويىنشا 10 اۆتوبۋس باعىتى قايتا جاڭاردى. بىراق كەيبىر جەكە تاسىمالداۋشىلار نارازىلىق تۋردىرىپ، جولاقىنى 150 تەڭگەگە دەيىن كوتەرۋدى تالاپ ەتەدى. قوستانايدا باعا 100 تەڭگە ەكەنىن ايتادى، بىراق وزدەرىنىڭ قىزمەت ساپاسىن كوتەرۋگە ۋادە بەرىپ وتىرعان جوق. الماتىداعى 80 تەڭگەلىك تاريف 2012 جىلدان بەرى كوتەرىلگەن جوق. 20 جىل ىشىندە اۆتوبۋس پاركتەرى اقشانى كۇرەپ تاۋىپ كەلدى. سۋبسيديانى الدى، كومەكتەسۋ ءبىر باسقا. ول قاراجاتتىڭ ءبارى قايدا كەتتى؟ ءبىز رەتكە كەلتىرگەن ۋاقىتتا مەملەكەتتىڭ قولداۋىمەن جولاۋشىلاردى تاسىمالداۋ نارىعى 20 ملرد تەڭگەنى قۇرادى. كەيبىرى قوقان-لوقى كورسەتكىلەرى كەلەدى. مۇنى قاتاڭ تۇردە رەتكە كەلتىرەمىز",، -دەدى بايبەك بۇگىن حالىق الدىندا ەسەپ بەرۋ كەزىندە.

اكىمنىڭ سوزىنشە، بيىل قوعامدىق كولىكتەردى سۋبسيديالاۋعا، 255 مىڭعا جۋىق جولاقى جەڭىلدىگى ءۇشىن جانە تاسىمالداۋشىلاردىڭ شىعىنىن جابۋعا 15 ملرد تەڭگە بولىنەتىنىن اتاپ ءوتتى.

ال بۇدان بۇرىن 17 قاڭتاردا الماتىدا جولاۋشى تاسىمالداۋشىلار قالا اكىمىنە اۆتوبۋس پاركتەرىنىڭ شىعىندارىن تولىق سۋبسيديالاۋ جانە اۆتوبۋستار مەن تروللەيبۋستارداعى جولاقىنى 150 تەڭگەگە دەيىن كوتەرۋ تۋرالى ماسەلەنى قاراۋدى وتىنگەن ەدى.

ايتا كەتەيىك، الماتىدا جولاقى قۇنى  قولما-قول تولەگەن جاعدايدا 150 تەڭگە. ال "وڭاي" كارتاسى، SMS جانە بانك كارتالارىمەن 80 تەڭگە تولەۋگە بولادى. بۇل جۇيە 2017 جىلدىڭ 1 تامىزىندا ەنگىزىلدى.

“The Qazaq Times”