فوتو: Kapital.kz

قر قارجى مينيسترلىگى مەملەكەت قازىناسىنداعى قارجىنى ءتيىمسىز پايدالانعان مينيسترلىكتەردىڭ اتىن اتادى. سونىمەن ەڭ كوپ يگەرىلمەي قالعان قارجى قورعانىس مينيسترلىگىنە تيەسىلى. بۇل تۋرالى قارجى ءمينيسترى باقىت سۇلتانوۆ مالىمدەدى. 

ۆەدومستۆو باسشىسىنىڭ سوزىنشە، 2016 جىلى بيۋدجەتتەن بولىنگەن قارجىنىڭ 36 ملرد تەڭگەسى كەلىسىمشارتتار مەرزىمىنىڭ وزگەرۋى مەن اتقارىلاتىن جۇمىستاردىڭ بەلگىلەنگەن مەرزىمنەن كەشىگۋىنە بايلانىستى يگەرىلمەي قالعان.

ەڭ كوپ يگەرىلمەي قالعان قارجى قورعانىس مينيسترلىگىنە تيەسىلى - 29 ملرد تەڭگە، ىشكى ىستەر مينيسترلىگى - 1,2 ملرد تەڭگە، ءبىلىم جانە عىلىم مينيسترلىگى - 1 ملرد تەڭگە، سىرتقى ىستەر مينيسترلىگى - 920,2 ملن تەڭگە، اۋىل شارۋاشىلىعى ءمينيسترى - 870,2 ملن تەڭگە، ادىلەت مينيسترلىگى - 759 ملن تەڭگە."بيۋدجەت اقشاسىن ءتيىمسىز پايلانۋ دەڭگەيى 2015 جىلمەن سالىستىرعاندا 2016 جىلى 1,7 ەسەگە ازايدى", - دەپ اتاپ ءوتتى باقىت سۇلتانوۆ. ءمينيستردىڭ سوزىنشە، بيۋدجەتكە تۇسكەن ءتۇسىم 7,7 ترلن تەڭگەنى قۇرادى. شىعىن 8,5 ترلن تەڭگە بولسا، بيۋدجەت تاپشىلىعى 741 ملرد تەڭگە بولعان. بۇل جوسپارداعى كورسەتكىشتەن 161,5 ملرد تەڭگەگە تومەن.

"نەگىزگى ايتا كەتەتىن جايت، 2015 جىلمەن سالىستىرعاندا وتكەن جىلى كىرىس 1 078 ملرد تەڭگەگە نەمەسە 30,8%-عا كوبىرەك. ال شىعىندار 2015 جىلمەن سالىستىرعاندا 1 338 ملرد تەڭگەگە كوپ بولدى. ءجىو-گە قاتىستى بيۋدجەت تاپشىلىعى 1,6%-دى قۇرادى. بىزدەگى جوسپار 2% بولعان. كىرىستەردى ارتىق ورىنداۋ ناتيجەسىندە 158,4 ملرد تەڭگە كولەمىندەگى قولما-قول اقشا قالدىقتارى جيناقتالدى", - دەپ ءتۇسىندىردى مينيسترلىك باسشىسى.

ءوز كەزەگىندە قورعانىس ءمينيسترىنىڭ ورىنباسارى تالعات مۇحتاروۆ 29 ملرد تەڭگەنىڭ نە ءۇشىن يگەرىلمەي قالعانىن ايتتى.

"قاراجات ناقتى سەبەپتەرمەن يگەرىلمەي قالدى. بۇل قارجى يل-76 اسكەري-ترانسپورتتىق ۇشاعىن ساتىپ الۋعا جۇمسالۋ كەرەك ەدى. الايدا ۇشاق باعاسىنىڭ قىمباتتاپ كەتۋىنە بايلانىستى ساتىپ الۋدان باس تارتۋ تۋرالى شەشىم قابىلداندى", - دەدى مۇحتاروۆ.

ونىڭ سوزىنشە، قالعان قارجى مەملەكەتقازىناسىنا قايتارىلعان.

“The Qazaq Times”