ۆولوگدالىق مويىنتىرەك زاۋىتى زاۋىت ديرەكتورىنىڭ ورىنباسارى ۆيكتور پوپوۆ 200 وزبەك ازاماتىمەن اڭگىمەلەستى. فوتو: centralasian.org

رەسەيدەگى ۆولوگدالىق مويىنتىرەك زاۋىتى مەن "رەنەسسانس" قۇرىلىس كومانياسى 14 مىڭ ءوزبەكستاندىققا جۇمىس ۇسىندى. بۇل تۋرالى "ورتالىق ازيا حابار قىزمەتى" جازدى. 

وزبەكستان ەڭبەك مينيسترلىگىنىڭ سىرتقى ەڭبەك ميگراتسياسى جونىندەگى اگەنتتىگى ءباسپاسوز قىزمەتىنىڭ جەتەكشىسى كاريم باحريەۆتىڭ ايتۋىنشا، ۆولوگدالىق مويىنتىرەك زاۋىتى وزبەكستاننىڭ 2 مىڭعا جۋىق مامانى مەن جۇمىسشىسىن جالدايتىن بولدى. 3 مامىردا اتالعان زاۋىت ديرەكتورىنىڭ ورىنباسارى ۆيكتور پوپوۆ 200 وزبەك ازاماتىمەن اڭگىمەلەستى.

بۇعان قوسا، 12 مىڭ وزبەك جۇمىسشىسىن رەسەيلىك "رەنەسسانس" قۇرىلىس كومپانياسى شاقىرىپ وتىر.

كاريم باحريەۆتىڭ ايتۋىنشا، وتكەن جىلى وزبەكستان ەڭبەك مينيسترلىگىنىڭ وكىلدەرى رەسەيدىڭ بىرقاتار ايماقتارىن ارالاپ، بىرنەشە ەڭبەك كەلىسىمىنە قول قويىپ قايتقان.

4-5 ساۋىردە وزبەك پرەزيدەنتى شاۆكات ميرزياەۆتىڭ رەسەيگە مەملەكەتتىك ساپارى كەزىندە 55 قۇجات قابىلداندى، سولاردىڭ ءبىرى وزبەك ازاماتتارىن رەسەيدە ۋاقىتشا ەڭبەك ەتۋدى ۇيىمداستىرۋعا ارنالعان.

 “The Qazaq Times”