فوتو: https://pbs.twimg.com

وزبەكستان پرەزيدەنتى شاۆكات ميرزياەۆ پەن قازاقستاننىڭ جاڭا پرەزيدەنتى قاسىم-جومارت توقاەۆ تەلەفون ارقىلى سويلەستى.

وزبەكستان پرەزيدەنتىنىڭ رەسمي سايتىندا ايتىلعانداي، ەكى ەل باسشىلارى حالىقارالىق ماسەلەلەر، قازاقستان مەن وزبەكستان اراسىنداعى ديپلوماتيالىق بايلانىس جانە استانا مەن تاشكەنتتىڭ الداعى قارىم-قاتىناسىن تالقىلاعان. سونىمەن قاتار، شاۆكات ميرزياەۆ توقاەۆتى جاڭا لاۋازىمىمەن قۇتتىقتاپ، «بۇل قادام قازاقستان حالقى مەن تۇڭعىش پرەزيدەنت نۇرسۇلتان نازارباەۆتىڭ جاڭا پرەزيدەنتكە سەنىم ارتاتىندىعىنىڭ دالەلى»، – دەگەن.

ايتا كەتەيىك، 19 ناۋرىزدا جەرگىلىكتى ۋاقىت بويىنشا ساعات 19:00-دە قازاقستاننىڭ تۇڭعىش پرەزيدەنتى نۇرسۇلتان نازارباەۆ وتستاۆكاعا كەتەتىندىگىن جاريا ەتتى. 20 ناۋرىزدا قر پارلامەنتى پالاتالارىنىڭ بىرلەسكەن وتىرىسىندا قر پرەزيدەنتى لاۋازىمىنا تاعايىندالعان قاسىم-جومارت توقاەۆ انت قابىلداپ، استانانىڭ اتاۋىن «نۇرسۇلتان» دەپ اتاۋدى ۇسىنعان. مۇنىمەن قوسا، توقاەۆ رەسپۋبليكاداعى قالالاردىڭ ورتالىق كوشەلەرىنىڭ اتاۋىن دا نۇرسۇلتان نازارباەۆتىڭ اتىنا بەرۋدى ۇسىندى.

"The Qazaq Times"