«The Qazaq Times» aqparat agenttiginiñ otandıq aqparat keñistigine şıqqanına 5 jıl toldı. Osı uaqıt işinde azamattıq qoğamnıñ damuı men täuelsiz jurnalistikanıñ örkendeuine qal-qadirimizşe qızmet etuge tırısıp keldik.  Täuelsiz boldıq. Aşıq közqarasımızdı anıq körsete aldıq. Äuelgi bağıtımızdı, jurnalistikağa tän beytaraptıq qağidasın wstandıq. Bwra tartpadıq,  bwqpantaylap qalmadıq. Eldegi sanaulı otandıq täuelsiz BAQ-tıñ qatarında boldıq. 

Bwl künde saytımızdıñ qazaq jäne ağılşın tildi aqparat keñistigine wsınğan kontentter sanı 100 mıñğa jetti. Bwl kontentterde halıqaralıq jäne el işindegi eleuli sayasi, äleumettik mañızdı degen oqiğalardı, solarğa qatıstı saraptamalar qamtıldı. Bwdan tıs, ğılım-tehnologiya, kisilik qwqıq, tarih, ädebiet taqırıptarında da birşama mol kontent qorına ie boldıq.

Jıl sayın älemdik aqparattan AQŞ-Qıtay, AQŞ-Resey, Qıtay-Tayuan, Qıtay-Şınjañ jäne Orta, Tayau-Şığıs, Auğanstan, Resey, käri qwrlıq Europanıñ ekonomikalıq jäne geo-sayasi jağdayın, jañalıqtarın qazaq oqırmandarına jetkizuge tırıstıq.

Al, el işi mäselelerinen, biılğını aytqanda, jıl basındağı mäjilsimenderdi saylaudan bastap jıl ortasındağı auıl äkimderin saylaudağı köringen kemşilikter men zañ bwzuşılıqtardı, öz talap tilegin aytuğa beybit şeruge şıqqandardıñ qwzırlı organdardıñ küştep wstap jatqandarın, sonday-aq "estuşı memeket" twjırımdamasın wsınğan el prezidentiniñ orındalmay jatqan uağdaları turalı aşıq qauzap keldik.

Ötip bara jatqan sıyır jılındağı törtkil dünieniñ tükpir-tükpirindegi aytulı oqiğalardıñ, Qazaq eline qatısı, ıqpalı boluı mümkin degen auqımdı mäselelerdiñ jañalığın, jay-japsarın aşqan sarapatamaların qazaq qoğamına, sanalı, közqaraqtı ortağa jetkizuge küş saldıq.

«The Qazaq Times» aqparattıq, qoğamdıq-sayasi portalınıñ jwmıs istegenine 5 jıl toluına oray, bizge senim bildirgen közqaraqtı oqırmandarımızğa aytar alğısımız şeksiz! Sanaulı täuelsiz aqparat qwralınıñ biri retinde, bwrauına swrauı ilesip jüretin memlekettik tendirge telmirtpey, öz oy, öz poziciyamızdı saqtauğa zor mümkindik bergen demeuşi azamattarğa da mıñ da bir alğıs!

Redakciyamızdıñ atınan, eldiñ amandığın, jwrttıq tınıştığın, barşa otandastarımızdıñ, iisi qazaq qandastarımızdıñ bay-quattı boluın şın jürekten tileymiz! Täuelsiz aqparat keñisigi keñip, azamattıq qoğam alğa basa bergey!

“TheQazaqTimes”