Ankarada Qazaqstan täuelsizdiginiñ 30 jıldığına arnalğan dostıq veloşeru ötti. 

Veloşeru qatısqan eluden astam sportşı Ankara bas köşelerimen jürip ötti. 12 şaqırımdı eñsergen velojürginşiler, Atatüriktiñ «Anıtkabir» mavzoleyine kelip toqtadı.

Şarada Qazaqstannıñ Türkiyadağı elşisi Abzal Saparbekov: «Qazaqstannıñ 30 jıldığın erekşe formatta atap ötip otırmız. Alğaş ret, Türkiyada velosport qauımdastığımen birlesip veloşeru wyımdastırdıq. Pandemiya jäne qwrban aytqa säykes kelgendikten qatısuşılar sanın şektep, 50-den astam toppen türik astanasınıñ körikti jerlerinde jürip ötti», – dedi.

Akciyanı eldiñ velosport federaciyası, eki eldiñ belsendi jastarı men eriktileri qoldadı. Sonımen qatar akciyağa Türkiya provinciyalarına velosipedpen sayahat jasağan sportşı Damir Köşeev te qatıstı.

34 jastağı Damir 3 aptada Istambwl-Bilejik-Kutahiya-Afiyonkarahisar-Burdur-Antaliya-Kaş-Fethie-Izmir-Polatlı jäne Ankara qalaların jürip ötken. Velojürginşiniñ aytuınşa, bwl sapardağı negizgi maqsat – şaharlarda boy kötergen Abay eskertkişine tağzım etip, turisterdiñ eñ köp twraqtaytın jerlerinde Türkistandı tanıstıru.

"The Qazaq Times"