Prezident Qasım-Jomart Toqaev Qarjılıq monitoring agenttiginiñ törağası Janat Elimanovtı qabıldap otır. Foto: Akorda.kz

Qazaqstanda 2,8 trillion teñge köleminde jalğan şot-fakturalar jazıp berumen aynalısqan 87 qılmıstıq toptıñ jolı kesilgen. Bwl aqparatttı bügin, 15 mausımda el prezidenti Qasım-Jomart Toqaevtıñ qabıldauında bolğan qarjılıq monitoring agenttiginiñ törağası Janat Elimanov ayttı. 

Aqorda resmi saytınıñ jazuınşa, Elimanov prezident Toqaevqa «köleñkeli» ekonomika deñgeyin qısqartu bağıtında jürgizilip jatqan jwmıstar turalı mälimet bergen. 

"Janat Elimanov Qasım-Jomart Toqaevqa  büginge deyin 2,8 trillion teñge köleminde jalğan şot-fakturalar jazıp berumen aynalısqan 87 qılmıstıq toptıñ jolı kesilgenin bayandadı. Qabıldanğan şaralardıñ nätijesinde zañdı twlğalardıñ qolma-qol aqşağa aynaldırğan qarjı kölemin 24 payızğa azaytu mümkin boldı. Bwdan bölek jasırın jwmıs istegen 10 cehtıñ qızmeti toqtatılıp, esepte joq 800 mıñ şölmekten astam alkogol' önimi tärkilendi. Sonday-aq 96 zañsız oyın mekemesi joyılıp, zañsız aynalımnan 1200-den astam oyın avtomattarı, terminaldar men poker üstelderi alındı. Mwnay jäne mwnay önimderi boyınşa 40 zañsız aynalım  deregi anıqtaldı" dep jazdı Aqorda saytı.

Agenttik törağasınıñ aytuınşa, 2021-2022 jıldarı Qazaqstannıñ jılıstatuğa qarsı jüyesi qılmıstıq jolmen tüsken tabıstardı zañdastıruğa jäne terrorizmdi qarjılandıruğa qarsı is-qimıl salasındağı FATF (Aqşanı jılıstatuğa qarsı kürestiñ qarjılıq şaraların äzirleu tobı) standarttarınıñ saqtaluı boyınşa özara bağalaudan ötui tiis.

"The Qazaq Times"