پرەزيدەنت قاسىم-جومارت توقاەۆ قارجىلىق مونيتورينگ اگەنتتىگىنىڭ توراعاسى جانات ەليمانوۆتى قابىلداپ وتىر. فوتو: Akorda.kz

قازاقستاندا 2,8 تريلليون تەڭگە كولەمىندە جالعان شوت-فاكتۋرالار جازىپ بەرۋمەن اينالىسقان 87 قىلمىستىق توپتىڭ جولى كەسىلگەن. بۇل اقپاراتتتى بۇگىن، 15 ماۋسىمدا ەل پرەزيدەنتى قاسىم-جومارت توقاەۆتىڭ قابىلداۋىندا بولعان قارجىلىق مونيتورينگ اگەنتتىگىنىڭ توراعاسى جانات ەليمانوۆ ايتتى. 

اقوردا رەسمي سايتىنىڭ جازۋىنشا، ەليمانوۆ پرەزيدەنت توقاەۆقا «كولەڭكەلى» ەكونوميكا دەڭگەيىن قىسقارتۋ باعىتىندا جۇرگىزىلىپ جاتقان جۇمىستار تۋرالى مالىمەت بەرگەن. 

"جانات ەليمانوۆ قاسىم-جومارت توقاەۆقا  بۇگىنگە دەيىن 2,8 تريلليون تەڭگە كولەمىندە جالعان شوت-فاكتۋرالار جازىپ بەرۋمەن اينالىسقان 87 قىلمىستىق توپتىڭ جولى كەسىلگەنىن باياندادى. قابىلدانعان شارالاردىڭ ناتيجەسىندە زاڭدى تۇلعالاردىڭ قولما-قول اقشاعا اينالدىرعان قارجى كولەمىن 24 پايىزعا ازايتۋ مۇمكىن بولدى. بۇدان بولەك جاسىرىن جۇمىس ىستەگەن 10 تسەحتىڭ قىزمەتى توقتاتىلىپ، ەسەپتە جوق 800 مىڭ شولمەكتەن استام الكوگول ءونىمى تاركىلەندى. سونداي-اق 96 زاڭسىز ويىن مەكەمەسى جويىلىپ، زاڭسىز اينالىمنان 1200-دەن استام ويىن اۆتوماتتارى، تەرمينالدار مەن پوكەر ۇستەلدەرى الىندى. مۇناي جانە مۇناي ونىمدەرى بويىنشا 40 زاڭسىز اينالىم  دەرەگى انىقتالدى" دەپ جازدى اقوردا سايتى.

اگەنتتىك توراعاسىنىڭ ايتۋىنشا، 2021-2022 جىلدارى قازاقستاننىڭ جىلىستاتۋعا قارسى جۇيەسى قىلمىستىق جولمەن تۇسكەن تابىستاردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل سالاسىنداعى فاتف (اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبى) ستاندارتتارىنىڭ ساقتالۋى بويىنشا ءوزارا باعالاۋدان ءوتۋى ءتيىس.

"The Qazaq Times"