Üş ayda apparat basşısınan vice-ministrge deyin ösken Serik Egizbaev pen vice-ministrlikten ketken Miras Däulenov. Fotokollaj: QR Ükimeti

Ükimet qaulısımen Serik Egizbaev Qazaqstannıñ aqparat jäne qoğamdıq damu vice-ministri qızmetine tağayındalsa, osı uaqıtqa deyin bilim vice-ministri bolıp kelgen Miras Däulenov ornınan bosatıldı.

Agronomnan aqparat vice-ministrine deyin... Ükimet baspasöz qızmetiniñ habarlauınşa,  osı uaqıtqa deyin ministrliktiñ apparat basşısı bolıp kelgen Egizbaev Balaevağa orınbasar retinde törtinşi vice-ministr lauazımın iemdendi. 58 jastağı şeneuniktiñ üş birdey mamandığı bar – agronom, memlekettik qızmet menedjeri, zañger.

Eñbek jolın Oral (qazirgi Batıs Qazaqstan) oblısındağı «Çapaev» asıl twqımdı mal zauıtında jwmısşı bolıp bastağan.  1986 jıldan 1990 jılğa deyin öñirdiñ komsomol wyımdarında är türli lauazımdarda jwmıs istegen. 1990-1997 jıldarı BQO-da Qazaqstan Jastar odağınıñ hatşısı-ideologiyalıq böliminiñ meñgeruşisi, Jastar odağınıñ oblıstıq filialınıñ birinşi hatşısı bolıp qızmet etken.

1997-1998 jıldarı oblıs äkimdiginde bas inspektor jäne wyımdastıru jäne kadr jwmısı bölimi meñgeruşisiniñ orınbasarı lauazımdarında bolğan. 2000 jıldıñ basında Qarjı ministrliginiñ Wyımdastıru jäne kadr jwmısı departamentiniñ bölim basşısı, keyinnen 2001-2007 jıldarı Prem'er-ministr keñsesinde türli qızmetter atqarğan. Al 2007-2016 jıldarı Prezident äkimşiliginde birneşe lauazımda jwmıs istegen. 2016 jılğı qazanda tosınnan auıl şaruaşılığı vice-ministri bolıp tağayındaldı. 2017 jılğı naurızda halıq qarjısı negizinde bilik sayasatın nasihattaytın «Qazaqstan» RTRK basqarma törağasınıñ öñirlik damu jönindegi orınbasarı, köp ötpey 2019 jıldıñ qırküyek ayınan 2021 jıldıñ aqpan ayına deyin BQO äkiminiñ orınbasarı qızmetin atqardı. Biıl aqpan ayınan beri apparat jetekşiliginde bolğan Egizbaev birer ayda-aq vice-ministr atanıp ülgerdi.

Bezgen şeneunik... Resmi mälimetke qarağanda, keyingi bir jarım jılğa juıq uaqıt bilim vice-ministri qızmetinde bolğan Miras Däulenov «öz ötinişimen» jwmıstan bosatıldı. Jası qırıqqa jaqındağan ol biıl otandıq vakcina öndirisi boyınşa jauaptı maman retinde köringen edi.

Däulenov qızmetin alğaş 2003 jılı jeke zañ firmasında zañger bolıp bastağan. 2004-2005 jıldarı ŞQO advokattar alqası advokatınıñ kömekşisi, 2006-2007 jıldarı kommerciyalıq qwrılımdarda zañger bolıp jwmıs istegen. 2012-2019 jıldarı astanadağı Qazaq gumanitarlıq zañ universitetinde kafedra meñgeruşisi, halıqaralıq ortalıq direktorı, ğılımi jwmıs jönindegi prorektor qızmetinde bolğan. 2018-2019 jıldarı universitet janındağı Salıq Zimanov atındağı Qwqıqtıq jäne ekonomikalıq zertteuler akademiyasınıñ basşısı qızmetin atqardı. Al 2019 jılğı jeltoqsan ayında soñğı jwmıs ornı bilim jäne ğılım vice-ministri lauazımında boldı. Däulenovtiñ «maylı» äri «jauaptı» orınnan nelikten ketkeni jäne qayda bararı äzirge belgisiz.

"The Qazaq Times"