Facebook jelisiniñ logosı. Körneki suret. Foto: REUTERS / Dado Ruvic

Keşe, qaraşanıñ 1-i Qazaqstannıñ Aqparat jäne qoğamdıq damu ministrligi «ziyankes äri zañsız kontentti joyu» üşin Facebook-tiñ işki jüyesine eksklyuziv qoljetimdilik alğanın habarlap edi. Bügin Facebook jelisiniñ Aziya-Tınıq mwhitı aymağına jauaptı ökili Qazaqstan Ükimetimen ortaq mälimdeme jasağanın teristegen boyda aqparat ministri Aida Balaeva tehkompaniyanıñ Gonkong ökildigimen kelisilgenin jazdı.

Halıqaralıq Reuters basılımınıñ habarlauınşa, atalğan tanımal jelige ielik etetin Meta Platforms kompaniyasınıñ Aziya-Tınıq mwhitı aymağı boyınşa kommunikaciya böliminiñ direktorı Ben MakKonahi birlesken mälimdeme jasaspağanın jetkizgen.

«Birinşiden, biz qazaq ükimetimen ortaq mälimdeme şığarğanımız joq. Qazaq ükimeti biliktiñ jergilikti zañdı bwzatın kontentterge tıyım salu turalı ötinişteri boyınşa ötken ğalamdıq talqılau negizinde özi mälimdeme jasadı» dep jazdı.

Barlıq aqparat qwraldarı jappay jazğan teristeu mälimdemesinen keyin tüske qaray aqparat ministri Aida Balaeva Facebook jelisindegi paraqşasında vedomstvo atınan arnayı jazba jariyaladı.

«Aqparat jäne qoğamdıq damu ministrligi negizgi kelissözderdi Gonkong qalasında ornalasqan Qıtay, Moñğoliya jäne Ortalıq Aziya öñiri boyınşa «Meta» («Facebook») kompaniyasınıñ öñirlik ofisimen jürgizdi. 1 qaraşada jariyalanğan birikken mälimdemeniñ mätini men onıñ BAQ-da jariyalanuı atalğan aymaqtıq keñseniñ basşılığımen tolıqtay kelisilgen bolatın» dedi.

Osıjan bir kün aldın, düysenbide ministrliktiñ resmi saytı «Qazaqstan ükimetine aqparattıq keñistiktiñ qauipsizdigin arttıru mäselesin şeşuge kömek körsetu üşin Facebook Qazaqstanğa işki «Kontentti habarlau jüyesine» («Content Reporting System» – CRS) tikeley eksklyuzivti qoljetimdilik berdi» dep jazğan.

Aqparat jäne qoğamdıq damu minitsrliginiñ öñirlik keñse basşılığımen jasalğan kelisimdi alpauıt kompaniyağa telip, Facebook pen Ükimettiñ birlesken mälimdemesi retinde jariyalauı qoğamda sıni pikir tudırdı.

Ministrlik pen kompaniya arasındağı «aqparat aytısı» Qazaqstanda bulling jäne kiberbulling mäselesin şeşu maqsatında äleumettik jelilerdi «uäjdi sebeppen bwğattau» şartın qamtitın zañ jobası qaralıp jatqan kezge twspa-tws keldi. Bwl azamattıq qoğam men köptegen qwqıq qorğauşılar tarapınan qattı sınğa wşıradı.

The Qazaq Times