Renaimaciya zalına kirip bara jatqan däriger. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Säuir 2021 jıl. Almatı qalası. Foto: QT / Kültegin Aspanwlı

Köktem tuğalı bir jarım ayda Qazaqstanda 70 mıñnan asa sırqat tirkelip ülgerdi. Kündelikti anıqtalıp jatqan nauqastar sanı eki mıñnan, al ölim jağdayı  20-dan azayar emes. Bwl pandemiya kezindegi eñ auır körsetkiş.

Densaulıq saqtau ministrliginiñ resmi mälimetinşe, elde 15 säuir koronavirus jwqqan 2656 adam, al 14-i küni koronavirus pnevmoniyasına şaldıqqan 71 adam tirkeldi. Qazir elde 37 mıñğa tarta adam (U07.1 nemese KVI+ boyınşa 36 393, U07.2 nemese KVI- boyınşa 475) auırıp jatır.

#U07.1 PTR testi arqılı koronavirus jwqqanı rastalğan nauqastardıñ jartısına juığı Almatı qalası (673) men astanada (601) tirkeldi. Odan keyingi qatarda eñ köbi – Almatı oblısı (232), Qarağandı (201), Aqtöbe (120), Şımkent (119), Atırau (117), BQO (112)  öñirlerinde. Ötken täulikte aurudan ayıqqan 2177 adam üyine jiberilgen. Bwdan özge särsenbi jiını 27 adam qaytıs bolğan.

#U07.2 14 säuir aqparatı bir täulikke keşigip beriletin koronavirus pnevmoniyasına şaldıqqan 85 nauqas esepke alındı. Vedomstvo dereginşe, Jambıl (13),  Almatı (12) oblısı men qalası (8), Şımkent (7), ŞQO men Aqtöbe (ärqaysı bes-besten) oblıstarında köptep tirkelgen. Sonımen qosa, 90 adam ayığıp şıqqan, ökiniştisi bir adam köz jwmğan.

#Jalpı  DenMin-niñ resmi mälimetinşe, emdelip jatqan 36 868 nauqastıñ 13 mıñı auruhanada, 24 mıñğa juığı ambulatorlıq baqılauda. Ahualı naşar 616 nauqastıñ jağdayı qiın, ondağı 168 adamnıñ häli öte auır. Bwdan özge 118 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan Qostanay men Türkistan oblıstarı «jasıl aymaqta». ŞQO, Qızılorda jäne Pavlodar, Mañğıstau, Jambıl, Mañğıstau, Soltüstik Qazaqstan oblıstarı «sarı», al Atırau, BQO, Aqtöbe, Aqmola, Almatı, Qarağandı oblıstarı, Almatı, Şımkent qalaları men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2 mıñ sırqat jäne 20 şaqtı ölim jağdayı tirkelip jatır. Säuir ayınıñ alğaşqı jartısında tabılğan keyster sanı – 35 mıñday sırqat jäne 309 ölim jağdayı. Bwl twtas naurız ayınıñ esebimen şamalas. Jalpı köktem tuğalı 70 mıñnan asa (KVI+ 65 mıñ, KVI- 2 mıñ) nauqas anıqtaldı, 675 adam (KVI+ 561, KVI- 114) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 281 mıñğa, 1 tamızdan bılayğı koronavirus pnevmoniyası 51 mıñğa jetken. DDSW derekqorı men Wlttıq statistikada Qazaqstanda auırğandar sanı 333 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 5,7 mıñı (KVI+ / U07.1 – 3333, KVI- / U07.2 – 742, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 49-orında twr.

Ükimettiñ soñğı deregine qarağanda, Qazaqstanda 576 mıñ adam koronavirusqa qarsı reseylik «Sputnik V» vakcinasınıñ alğaşqı dozasın alğan.

"The Qazaq Times"