Komp'yuterlik tomografiya tüsirilimin jürgizip otırğan radiator-däriger. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Almatı qalası. Foto: QT / Kültegin Aspanwlı

Densaulıq saqtau ministrliginiñ resmi mälimetinşe, elde 8 säuir koronavirus jwqqan 2440 adam, al 7-si küni koronavirus pnevmoniyasına şaldıqqan 104 adam tirkeldi. Qazir elde 30 mıñnan asa adam (U07.1 nemese KVI+ boyınşa 29 429, U07.2 nemese KVI- boyınşa 790) auırıp jatır.

#U07.1 PTR testi arqılı koronavirus jwqqanı rastalğan nauqastardıñ jartısı rekordtıq mölşerde Almatı qalası (717) men astanada (446) tirkeldi. Odan keyingi qatarda eñ köbi – Almatı oblısı (254), Qarağandı (169), Atırau (149), BQO (110), Aqtöbe (116), Aqmola (101) oblıstarı jäne Şımkentte (72). Ötken täulikte aurudan ayıqqan 1786 adam üyine jiberilgen. Bwdan özge särsenbi jiını 19 adam qaytıs bolğan.

#U07.2 7 säuir aqparatı bir täulikke keşigip beriletin koronavirus pnevmoniyasına şaldıqqan 104 nauqas esepke alındı. Vedomstvo dereginşe, Almatı oblısı (44) men qalası (10), Atırau (7), Aqmola, Aqtöbe jäne Jambıl (ärqaysı altı-altıdan), Qostanay (5) öñirlerinde köptep tirkelgen. Sonımen qosa, 172 adam ayığıp şıqqan, ökiniştisi 3 adam köz jwmğan.

#Jalpı  DenMin-niñ resmi mälimetinşe, emdelip jatqan 30 219 nauqastıñ 11 mıñı auruhanada, 19 mıñğa juığı ambulatorlıq baqılauda. Ahualı naşar 517 nauqastıñ jağdayı qiın, ondağı 163 adamnıñ häli öte auır. Bwdan özge 87 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan Şımkent qalası, Qızılorda jäne Pavlodar, Mañğıstau, Soltüstik Qazaqstan oblıstarı «sarı», al Atırau, BQO, Aqtöbe, Aqmola, Almatı, Qarağandı oblıstarı, Almatı qalası men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2 mıñğa juıq sırqat jäne 15 şaqtı ölim jağdayı tirkelip jatır. Säuir ayınıñ alğaşqı segiz küninde tabılğan keyster sanı – 17,5 mıñ sırqat jäne 145 ölim jağdayı. Jalpı köktem tuğalı 52 mıñnan asa (KVI+ 50,5 mıñ, KVI- 1,8 mıñ) nauqas anıqtaldı, 511 adam (KVI+ 418, KVI- 93) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 264 mıñğa, 1 tamızdan bılayğı koronavirus pnevmoniyası 51 mıñğa jetken. DDSW derekqorı men Wlttıq statistikada Qazaqstanda auırğandar sanı 315 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 5,5 mıñı (KVI+ / U07.1 – 3190, KVI- / U07.2 – 721, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 49-orında twr.

Ükimettiñ soñğı deregine qarağanda, Qazaqstanda 254 mıñ adam koronavirusqa qarsı reseylik «Sputnik V» vakcinasınıñ alğaşqı dozasın alğan.

"The Qazaq Times"