Almatı qalasındağı temir şarbaqtardıñ birinde iluli twrğan körneki aqparat. Säuir 2021 jıl. Foto: QT / Kültegin Aspanwlı

Densaulıq saqtau ministrliginiñ bügingi deregine säykes, 585 adamnan koronavirus anıqtalğan. Onıñ 490-ında simptomdıq belgileri bar, 95-i simptomsız.

Qoğamdıq densaulıq saqtau basqarmasınıñ resmi mälimetinşe, ötken täulikte 353 adam auruhanağa jatqızılğan jäne 491 adam üyine jiberilgen. Naurız ayınıñ ortasında bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatının eskertken.

Jalpı qalada dayındalğan 5,6 mıñ orınnıñ 3114-inde sırqat emdelude. Ondağı 2,4 mıñ adamnıñ jağdayı naşar, 570-i auır jäne 77 nauqas tım auır hälde. Sonday-aq, 87 bala jeñil jäne ortaşa küyde stacionarda jatır. Al reanimaciya jäne qarqındı terapiya bölimderindegi 272 orınnıñ 178-inde nauqastar jatır. 14 adam ÖJJ, 69 nauqas invazivti emes ÖJJ-ımen jäne 64 sırqat High flow apparatımen tınıstap jatır.

Bwdan özge sıyımdılığı 815 orın bolatın 7 qonaq üy karantin mekemesi retinde jwmıs isteydi.

Osı künge deyin qalada 44 mıñğa tarta twrğın vakcinanıñ alğaşqı jäne 7 mıñdayı ekinşi dozasın saldırğan.

Almatıda bir jılda sırqattar qatarı 43 mıñnan asqan. Mwnıñ 29%-ı, yağni 12,6 mıñ adam osı köktemde tirkelgen. Ökinişke qaray, osı aralqta 152 almatılıq köz jwmğan.

BAÄ, Mısır, Mal'div, Ispaniya, Türkiya, Gruziya, Belarus', Şri-Lanka, Saud Arabiyası, QHR, Oñtüstik Koreya, Germaniya, Ukraina, Resey Federaciyası, Äzirbayjan, Täjikstan, Özbekstan jäne Qırğızstan tärizdi elderden Almatı qalasına 1 naurızdan beri jüzdegen halıqaralıq äue reysi keldi. Köktem tuğalı Alatau baurayına 562 reyspen 81 292 jolauşı wşıp kelgen: 76 786 adam PTR qorıtındısımen, 4506 adam PTR anıqtamasınsız. Osınıñ saldarınan jwğu jäne ölimge soqtıru qateri joğarı britandıq jäne oñtüstikafrikalıq ştamdar tirkelip, özge öñirlerge taralğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2 mıñğa juıq sırqat jäne 15 şaqtı ölim jağdayı tirkelip jatır. Köktem tuğalı 45 mıñğa tarta (KVI+ 43 mıñ, KVI- 1,5 mıñ) nauqas anıqtaldı, 438 adam (KVI+ 357, KVI- 81) ömirden qayttı.Qalanıñ bas sanitar därigeri Jandarbek Bekşin keyingi bes aptada 10 qaulı şığardı. Sebebi qabıldanğan ereje men qatañdatılğan lokdaun şarası kütkendey nätije bermedi. Mwnı düysenbi küngi brifingte Bekşin demalıs künderi qoğamdıq kölikti toqtatu jäne sauda qatarlarınıñ jwmısın şekteu siyaqtı şeşim «tiimsiz bolmağanın», yağni bwdan indet ahualı jaqsarmağanın moyındadı. Ol üş aptadan asa uaqıt «qızıl aymaqta» twrğan qalada tirkelip jatqan nauqastar virustı «köbine jayau jürginşilerdiñ joldarı men sayabaqta» jwqtırğanın aytadı.

Bıltır 13 naurızdan beri COVID-19 infekciyasın jwqtırğandar qatarı 257 mıñğa, 1 tamızdan bılayğı koronavirus pnevmoniyası 51 mıñğa juıqtağan. DDSW derekqorı men Wlttıq statistikada Qazaqstanda auırğandar sanı 307,5 mıñğa jaqındağan. Degenmen Ükimet koronavirus pen onıñ pnevmoniyasın eki bölek esepteydi. Sonday-aq pandemiya kezinde jalpı virus jwqqandardıñ 5457-si (KVI+ / U07.1 – 3129, KVI- / U07.2 – 709, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

"The Qazaq Times"