Almatı qalasınıñ «Halıq Arena» sport keşeninde 1000 nauqastı qabılday alatın uaqıtşa provizor ortalığı qwrıldı. Foto: Qalanıñ qoğamdıq densaulıq saqtau basqarması

Üş aptadan beri «qızıl aymaqta» twrğan Almatı qalasındağı «Halıq Arena» sport keşeni uaqıtşa emdeu ornına aynaldı. Särsenbi küngi tañdağı aqparat boyınşa, onda jağdayı orta därejedegi 18 nauqas jatır.

Qalalıq qoğamdıq densaulıq saqtau basqarmasınıñ mälimetine qarağanda, sport keşenindegi gospital' häli ortaşa pacientterge arnap qwrılğan.

«Koronavirustı taratpas üşin jäne auruhanalar jüyesindegi jüktemeni jeñildetu maqsatında osınday şeşim qabıldandı. Äzirge mwnda 1000 tösek-orın jabdıqtaldı. Uaqıtşa aşılğan provizorlıq ortalıqta ortaşa deñgeydegi jäne sozılmalı janama auruı bar qart nauqastar emdeletin boladı. Äu bastan bwl jerde medicinalıq kömek körsetuge jağday jasalğan. Sırqattı emdeuge arnalğan zamanaui qwrılğılar, barlıq kerek-jaraqpen qamtılğan», – delingen resmi habarlamada.

Osığan deyin «Halık Arena» keşeni provizorlıq ortalıq retinde bıltır «mausım-şilde qırğınınan» keyin, indettiñ beti qaytar twsta, tamız ayına qaray qwrılğan edi.

«Keşen üzdiksiz jılıtıladı, pacientterdi qabıldau kezinde temperatura +25-26 gradusqa deyin köterildi. Kündizgi tamaqtanu rejimin qamtamasız etetin autsosrs-kompaniya azıq-auqattı qoldanbası birrettik ıdıspen uaqıtılı jetkizip otır. Gigienalıq kütim üşin de jağday jasalğan», – dep naqtıladı basqarmanıñ baspasöz qızmeti.

Densaulıq saqtau ministrliginiñ bügingi deregine säykes, 537 adamnan koronavirus pen pnevmoniyası anıqtalğan. PTR testi arqılı virus jwqqanı rastalğan 526 nauqstıñ 425-inde simptomdıq belgileri bar, 101-i simptomsız.

Ötken täulikte 306 adam auruhanağa jatqızılğan jäne 209 adam üyine jiberilgen. Bas sanitar-därigeri Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatının eskertken.

Almatı qalasındağı densaulıq saqtau salasındağı jağdaydı keñirek bayandar bolsaq, qazir jwqpalı aurularğa arnalğan barlıq 5 mıñ orınnıñ 2783-i bos emes. Onıñ 109-ı bala. Sonımen qosa, reanimaciya bölimderindegi 295 orınnıñ 125-inde nauqastar jatır. 6 adam ÖJJ, 54 nauqas invazivti emes ÖJJ-ımen jäne 35 sırqat High flow apparatımen tınıstap jatır.

Qalalıq sanitarlıq-epidemiologiyalıq baqılau departamenti basşısınıñ orınbasarı Äsel Qalıqova keyingi jeti künde anıqtalğan sırqattar sanı 100 mıñ twrğınğa şaqqanda 149,9 bolğanın jäne R reproduktivti körsetkiş 1,114-ke jetkenin mälimdedi. Onıñ habarlauınşa, qazir indettiñ 3088 oşağı bar. 2759 nauqas stacionarda, 3257 adam ambulatorlıq deñgeyde emdelip jatır.

Sonday-aq, sıyımdılığı 815 orın bolatın 7 qonaq üy karantin mekemesi retinde jwmıs isteydi.

Qalada nebäri 15 750 adam vakcinanıñ alğaşqı dozasın saldırğan. Eki dozanı tolıq alğandar  qatarı 3,2 mıñ adam ğana.

Naurız ayınıñ 1-i men 30-ı aralığında qalada 9098 nauqas (KVI+ 9010, KVI- 88) tirkeldi. Bwl osı uaqıtqa deyin tirkelgen barlıq (1.03.2020-30.03.2021 j.j. aralığında auırğan 39 613 adam) sırqattıñ 23%-ı. Elde osı ayda esepke alınğan 32,7 mıñ sırqattıñ 27,7%-ı bir ğana Almatı qalasınan.

"The Qazaq Times"