Jahandıq indet bastalğan kezde birqatar Şığıs Aziya elderi virustıñ taraluın auızdıqtauda älemge öz ülgisin körsetken bolatın. Biraq, bir jıl ötip älem elderi vakcinalardı qoldana bastağan kezde atalğan aymaqtağı elder artta qalğanday boldı.

Bwl qatardağı elderdiñ biri – Oñtüstik Koreya. Koreya jaña täj tärizdi virusqa alğaş tap bolğan elderdiñ qatarında jäne bıltır aqpan ayınıñ özinde pandemiya eldiñ üşinşi iri qalasına oyran salğan edi. Süyte twra Oñtüstik Koreya virus taralğan alğaşqı aptada-aq jağdaydı baqılauğa ala aldı. Seul qoldanğan pandemiyanı toqtatu, baılau şaraları älem elderi jağınan alqauğa da ie bolğan. Tañ qalarlığı, Oñtüstik Koreya damığan elder arasında vakciyananı eñ soñınan qolğa alğan el bolıp qaldı.

Şığıs Aziyadağı vakcina jasau, öndiriske qoyu jäne vakcinalau jağdayın baqılağan qoğamdıq wyımdar aymaqtağı eñ bay elderdiñ özinde vakcinalau 2022 jıldıñ özinde de tolıq jüzege aspauı mümkin ekenin boljağan.

Qazir, koreyalıqtardıñ otandıq vakcinağa köp ümit artıp otırğanına qaramastan, eldegi vakcina jasau tabıstı bolıp jatqan joq. Bwl eldiñ densaulıq saqtau salasına degen senimdi birşama älsiretip tastadı. Qazir Oñtüstik Koreya koronavirustı anıqtaytın testterdiñ joğarı däldigi jäne qoldanu mümkindiginiñ keñdigine süyene otırıp, jağdaydı baqılauda wstap twr. Ärine, bwğan eldegi medicina jüyesiniñ kemeldiligi de äser etip otır.

“The Qazaq Times”