جاھاندىق ىندەت باستالعان كەزدە بىرقاتار شىعىس ازيا ەلدەرى ۆيرۋستىڭ تارالۋىن اۋىزدىقتاۋدا الەمگە ءوز ۇلگىسىن كورسەتكەن بولاتىن. بىراق، ءبىر جىل ءوتىپ الەم ەلدەرى ۆاكتسينالاردى قولدانا باستاعان كەزدە اتالعان ايماقتاعى ەلدەر ارتتا قالعانداي بولدى.

بۇل قاتارداعى ەلدەردىڭ ءبىرى – وڭتۇستىك كورەيا. كورەيا جاڭا ءتاج ءتارىزدى ۆيرۋسقا العاش تاپ بولعان ەلدەردىڭ قاتارىندا جانە بىلتىر اقپان ايىنىڭ وزىندە پاندەميا ەلدىڭ ءۇشىنشى ءىرى قالاسىنا ويران سالعان ەدى. سۇيتە تۇرا وڭتۇستىك كورەيا ۆيرۋس تارالعان العاشقى اپتادا-اق جاعدايدى باقىلاۋعا الا الدى. سەۋل قولدانعان پاندەميانى توقتاتۋ، باىلاۋ شارالارى الەم ەلدەرى جاعىنان القاۋعا دا يە بولعان. تاڭ قالارلىعى، وڭتۇستىك كورەيا دامىعان ەلدەر اراسىندا ۆاكتسيانانى ەڭ سوڭىنان قولعا العان ەل بولىپ قالدى.

شىعىس ازياداعى ۆاكتسينا جاساۋ، وندىرىسكە قويۋ جانە ۆاكتسينالاۋ جاعدايىن باقىلاعان قوعامدىق ۇيىمدار ايماقتاعى ەڭ باي ەلدەردىڭ وزىندە ۆاكتسينالاۋ 2022 جىلدىڭ وزىندە دە تولىق جۇزەگە اسپاۋى مۇمكىن ەكەنىن بولجاعان.

قازىر، كورەيالىقتاردىڭ وتاندىق ۆاكتسيناعا كوپ ءۇمىت ارتىپ وتىرعانىنا قاراماستان، ەلدەگى ۆاكتسينا جاساۋ تابىستى بولىپ جاتقان جوق. بۇل ەلدىڭ دەنساۋلىق ساقتاۋ سالاسىنا دەگەن سەنىمدى ءبىرشاما السىرەتىپ تاستادى. قازىر وڭتۇستىك كورەيا كوروناۆيرۋستى انىقتايتىن تەستتەردىڭ جوعارى دالدىگى جانە قولدانۋ مۇمكىندىگىنىڭ كەڭدىگىنە سۇيەنە وتىرىپ، جاعدايدى باقىلاۋدا ۇستاپ تۇر. ارينە، بۇعان ەلدەگى مەديتسينا جۇيەسىنىڭ كەمەلدىلىگى دە اسەر ەتىپ وتىر.

“The Qazaq Times”