Bayden "Ülken jetilik" jetekşilerimen virtualdı kezdesu ötkizbek. Foto: The Times of Israil.

Senbi küni taratqan Aq üy mälimdemesine qarağanda, osı aptada Bayden alğaş ret «Ülken jetilik» (G7) qwramındağı liderlermen virtualdı kezdesu ötkizedi. Kezdesude COVID-19 pandemiyası, älemdik ekonomika jäne jalpı Qıtaymen qarım-qatınas turalı talqılanadı dep kütilude.

Aq üy mälimdemesinde: «Älemdegi demokratiyalıq narıqtıq ekonomikalardıñ jetekşilerimen virtualdı keñes prezident Baydenge jaña koronavirus pandemiyasın jeñu mken jahandıq ekonomikanı qalpına keltiru josparların talqılauğa mümkindik beredi», – degen. Aq üy mälimdemesine qarağanda, Bayden «Ülken jeti» qwramındağı elderdiñ basşılarımen pandemiyağa qarsı küres jäne onıñ saldarlarınan bolatın ekonomikalıq problemalardı, sonday-aq vakcina mäselelerin talqılamaq.

Bayden Aq üy biligin qolına alğannan keyin Qwrama Ştattardıñ älem elderimen dialogın jandandıruğa küş salğanı bayqaladı. Onıñ alğaşqı bwyrıqtarınan keyin Qwrama Ştattar Parij kelisimine jäne DDSW-ğa qaytıp oraldı. Soğan qosa, şielenisti Qıtaymen qarım-qatınasta klimat özgeristeri, pandemiya sekildi ortaq mäselelerde ıntımaqtastıq ornatatının jetkizdi. Biraq, bwl onıñ Tramp kezindegi Qıtayğa bağıttalğan eknomikalıq sayasattan tübegeyli bas tartatının bildirmeydi.

Aldağı «Ülken jetilik» keñesinen keyin älemniñ, anıqtap aytqanda AQŞ pen onıñ birqatar odaqtastarınıñ Qıtayğa degen wstanımdarı anıq bolmaq. Aq üy bwl turasında: «Prezident Bayden sonımen qatar bizdiñ wjımdıq bäsekege qabilettiligimizdi arttıru üşin investiciyalau qajettiligi turalı jäne Qıtaydan tuındaytın ekonomikalıq qiındıqtarğa jauap beru üşin jahandıq erejelerdi jañartudıñ mañızdılığın talqılaydı», – degen bolatın.

“The Qazaq Times”