بايدەن "ۇلكەن جەتىلىك" جەتەكشىلەرىمەن ۆيرتۋالدى كەزدەسۋ وتكىزبەك. فوتو: The Times of Israil.

سەنبى كۇنى تاراتقان اق ءۇي مالىمدەمەسىنە قاراعاندا، وسى اپتادا بايدەن العاش رەت «ۇلكەن جەتىلىك» (G7) قۇرامىنداعى ليدەرلەرمەن ۆيرتۋالدى كەزدەسۋ وتكىزەدى. كەزدەسۋدە COVID-19 پاندەمياسى، الەمدىك ەكونوميكا جانە جالپى قىتايمەن قارىم-قاتىناس تۋرالى تالقىلانادى دەپ كۇتىلۋدە.

اق ءۇي مالىمدەمەسىندە: «الەمدەگى دەموكراتيالىق نارىقتىق ەكونوميكالاردىڭ جەتەكشىلەرىمەن ۆيرتۋالدى كەڭەس پرەزيدەنت بايدەنگە جاڭا كوروناۆيرۋس پاندەمياسىن جەڭۋ مكەن جاھاندىق ەكونوميكانى قالپىنا كەلتىرۋ جوسپارلارىن تالقىلاۋعا مۇمكىندىك بەرەدى»، – دەگەن. اق ءۇي مالىمدەمەسىنە قاراعاندا، بايدەن «ۇلكەن جەتى» قۇرامىنداعى ەلدەردىڭ باسشىلارىمەن پاندەمياعا قارسى كۇرەس جانە ونىڭ سالدارلارىنان بولاتىن ەكونوميكالىق پروبلەمالاردى، سونداي-اق ۆاكتسينا ماسەلەلەرىن تالقىلاماق.

بايدەن اق ءۇي بيلىگىن قولىنا العاننان كەيىن قۇراما شتاتتاردىڭ الەم ەلدەرىمەن ديالوگىن جانداندىرۋعا كۇش سالعانى بايقالادى. ونىڭ العاشقى بۇيرىقتارىنان كەيىن قۇراما شتاتتار پاريج كەلىسىمىنە جانە ددسۇ-عا قايتىپ ورالدى. سوعان قوسا، شيەلەنىستى قىتايمەن قارىم-قاتىناستا كليمات وزگەرىستەرى، پاندەميا سەكىلدى ورتاق ماسەلەلەردە ىنتىماقتاستىق ورناتاتىنىن جەتكىزدى. بىراق، بۇل ونىڭ ترامپ كەزىندەگى قىتايعا باعىتتالعان ەكنوميكالىق ساياساتتان تۇبەگەيلى باس تارتاتىنىن بىلدىرمەيدى.

الداعى «ۇلكەن جەتىلىك» كەڭەسىنەن كەيىن الەمنىڭ، انىقتاپ ايتقاندا اقش پەن ونىڭ بىرقاتار وداقتاستارىنىڭ قىتايعا دەگەن ۇستانىمدارى انىق بولماق. اق ءۇي بۇل تۋراسىندا: «پرەزيدەنت بايدەن سونىمەن قاتار ءبىزدىڭ ۇجىمدىق باسەكەگە قابىلەتتىلىگىمىزدى ارتتىرۋ ءۇشىن ينۆەستيتسيالاۋ قاجەتتىلىگى تۋرالى جانە قىتايدان تۋىندايتىن ەكونوميكالىق قيىندىقتارعا جاۋاپ بەرۋ ءۇشىن جاھاندىق ەرەجەلەردى جاڭارتۋدىڭ ماڭىزدىلىعىن تالقىلايدى»، – دەگەن بولاتىن.

“The Qazaq Times”