Almatı qalasındağı №292 saylau uçaskesindegi byulleten' saluğa arnalğan jäşik. Foto: QT / Asan Anarbaywlı

№292 saylau uçaskesiniñ törayımı Rauşan Jwmaşqızınıñ aytuınşa, sağat 19:30-dağı mälimet boyınşa 2599 saylauşınıñ şamamen 500-i dauıs bergen.

Uçaskedegi jağdaydı 5 adam baqılauşı äri bayqauşı retinde baqılap otır. Redakciya tilşisimen tildesuden tartınıp, atı-jönin atamağan, özin «Qoğamdıq joba» mekemesiniñ baqılauşısı retinde tanıstırğan er adam saylau barısına «jaqsı» degen bağa beredi.

Almatı qalasındağı Qazaqfil'm ıqşam audanında ornalasqan №292 saylau uçaskesi. Foto: QT / Asan Anarbaywlı

«Saylau tamaşa ötip jatır. Adamdardıñ bäri küni boyı keldi. Qazir ğana şığar sayabırsığanı. Saylauşılardı sanağanımız joq. Basında sanap edik, keyin şatısıp qaldıq. Sosın qoya saldıq», – deydi ol.

Jergilikti twrğındardıñ saylauğa qatısuda belsendiligi tömen. Almatı qalasındağı Qazaqfil'm ı/a ornalasqan №292 saylau uçaskesi. Foto: QT / Asan Anarbaywlı

Ortalıq saylau komissiyası sağat 20.00-degi mälimetine qarağanda, Almatı qalasındağı dauıs beruge qwqılı azamattardıñ nebäri  30,3%-ı ğana saylauğa kelgen. Sayasi oqiğalardıñ oşağı sanalatın azamattıq qoğamnıñ belsendi böligi şoğırlanğan qalanıñ saylauğa qatısu qarqını öte bäseñ. Osığan wqsas jağday az emes. Redakciya bas swqqan №377 saylau uçaskesiniñ törayımı Asiya Nasipbayqızı «sağat 14:30-ğa deyin saylauşılar tizimindegi 2,3 mıñ adamnıñ bar-joğı 200-ge juığı dauıs bergeni» turalı pikir bildirgen.

Almatı qalasındağı №377 saylau uçaskesi. Foto: QT / Asan Anarbaywlı

OSK respublika köleminde 63,1% saylauşı qatısqanın aytadı. Biraq bwğan kümänmen qaraytındar bar.

"The Qazaq Times"