الماتى قالاسىنداعى №292 سايلاۋ ۋچاسكەسىندەگى بيۋللەتەن سالۋعا ارنالعان جاشىك. فوتو: QT / اسان اناربايۇلى

№292 سايلاۋ ۋچاسكەسىنىڭ ءتورايىمى راۋشان جۇماشقىزىنىڭ ايتۋىنشا، ساعات 19:30-داعى مالىمەت بويىنشا 2599 سايلاۋشىنىڭ شامامەن 500-ءى داۋىس بەرگەن.

ۋچاسكەدەگى جاعدايدى 5 ادام باقىلاۋشى ءارى بايقاۋشى رەتىندە باقىلاپ وتىر. رەداكتسيا تىلشىسىمەن تىلدەسۋدەن تارتىنىپ، اتى-ءجونىن اتاماعان، ءوزىن «قوعامدىق جوبا» مەكەمەسىنىڭ باقىلاۋشىسى رەتىندە تانىستىرعان ەر ادام سايلاۋ بارىسىنا «جاقسى» دەگەن باعا بەرەدى.

الماتى قالاسىنداعى قازاقفيلم ىقشام اۋدانىندا ورنالاسقان №292 سايلاۋ ۋچاسكەسى. فوتو: QT / اسان اناربايۇلى

«سايلاۋ تاماشا ءوتىپ جاتىر. ادامداردىڭ ءبارى كۇنى بويى كەلدى. قازىر عانا شىعار سايابىرسىعانى. سايلاۋشىلاردى ساناعانىمىز جوق. باسىندا ساناپ ەدىك، كەيىن شاتىسىپ قالدىق. سوسىن قويا سالدىق»، – دەيدى ول.

جەرگىلىكتى تۇرعىنداردىڭ سايلاۋعا قاتىسۋدا بەلسەندىلىگى تومەن. الماتى قالاسىنداعى قازاقفيلم ى/ا ورنالاسقان №292 سايلاۋ ۋچاسكەسى. فوتو: QT / اسان اناربايۇلى

ورتالىق سايلاۋ كوميسسياسى ساعات 20.00-دەگى مالىمەتىنە قاراعاندا، الماتى قالاسىنداعى داۋىس بەرۋگە قۇقىلى ازاماتتاردىڭ نەبارى  30,3%-ى عانا سايلاۋعا كەلگەن. ساياسي وقيعالاردىڭ وشاعى سانالاتىن ازاماتتىق قوعامنىڭ بەلسەندى بولىگى شوعىرلانعان قالانىڭ سايلاۋعا قاتىسۋ قارقىنى وتە باسەڭ. وسىعان ۇقساس جاعداي از ەمەس. رەداكتسيا باس سۇققان №377 سايلاۋ ۋچاسكەسىنىڭ ءتورايىمى اسيا ناسيپبايقىزى «ساعات 14:30-عا دەيىن سايلاۋشىلار تىزىمىندەگى 2,3 مىڭ ادامنىڭ بار-جوعى 200-گە جۋىعى داۋىس بەرگەنى» تۋرالى پىكىر بىلدىرگەن.

الماتى قالاسىنداعى №377 سايلاۋ ۋچاسكەسى. فوتو: QT / اسان اناربايۇلى

وسك رەسپۋبليكا كولەمىندە 63,1% سايلاۋشى قاتىسقانىن ايتادى. بىراق بۇعان كۇمانمەن قارايتىندار بار.

"The Qazaq Times"