Qazaqstan biligi qızmet barısında koronavirus jwqtırğan medicina qızmetkerlerine memlekettik byudjetten bir rettik ötemaqı töleudi toqtattı. Bwl turalı 21 qazanda ötken brifingte densaulıq saqtau ministriniñ birinşi orınbasarı Marat Şoranov habarladı.

Onıñ sözinşe, koronaviruspen küres üşin qwrılğan ükimetaralıq komissiya şeşim qabıldap, 20 qazannan bastap virus jwqtırğan därigerlerden ötemaqığa ötiniş qabıldau toqtattı.

Qazaqstan biligi naurızda elde indet taray bastağanda koronavirus jwqtırğan därigerlerge byudjetten 2 mln teñge, indetten qaytıs bolğan därigerlerge 10 mln teñge töleu turalı şeşim qabıldağan.

«20 qazannan bastap aymaqtıq komissiyalar medicina qızmetkerlerinen ötemaqı töleu jönindegi ötinişterdi qabıldaudı toqtattı. Virus jwqtırğan 12 983 medicina qızmetkerleriniñ 9309-ı jwmıs ornında käsbi qızmetin atqarıp jürgende jwqtırğan. Olarğa ötemaqı tölendi», – dedi M.Şoranov.

Şoranov jwmıs barısında Covid indetine şaldığıp, qaytıs bolğan därigerlerdiñ jaqındarına beriletin 10 mln teñge ötemaqı saqtalatının jetkizdi. Resmi mälimet boyınşa, elde naurızdan beri 182 däriger indetten köz jwmğan. Ministrlik marqwm bolğan barlıq därigerdiñ jaqındarına ötemaqı tölengenin aytadı.

Ministrlik ökiliniñ sözinşe, endi däriger jwmıs barısında virus jwqtırsa, oğan qoldaudı medicinalıq mekeme, käsipodaq ne jergilikti bilik körsetui tiis.

«Bwl medicinalıq mekeme jetekşilerine medqızmetkerlerdiñ qauipsizdigin qamtamasız etuge, sanepidrejimdi baqılauğa ıntalandıradı», – dedi ol.

Şoranov jergilikti bilik ne medicinalıq mekeme virus jwqtırğan därigerge qoldaudı qalay körsetetinin aşıp aytpadı.

Bilik indetpen küresip jatqan därigerlerdiñ jalaqısına qosımşa tölem töleu saqtalatının mälimdedi. Infekciyalıq auruhanada isteytin medqızmetkerdiñ aylığına 850 mıñ teñge, provizorlıq stacionarda jwmıs isteytin däriger men fel'dşer jalaqısına 425 mıñ teñge, karantindik stacionar, sanitarlıq däriger men jedel järdem jürgizuşisiniñ aylığına 212 mıñ teñge qosıladı.

Qazaqstanda indet bastalğalı mıñdağan däriger virus jwqtırğan. Elde jaz aylarında indet örşigen twsta indetten köz jwmğan därigerlerdiñ de sanı kürt arttı. Bilik virus jwqtırğan medqızmetkerlerge jäne indetten qaytıs bolğan därigerlerdiñ jaqındarına ötemaqı töleu üşin komissiya qwrğan. Koronavirus kesirinen qaytıs bolğan därigerlerdiñ jaqındarı komissiya ötinişterin wzaq qarap jatqanın aytıp şağımdana bastadı. Keyin Qazaqstan prezidenti Qasım-Jomart Toqaev jwmıs barısında indetke şaldığıp, köz jwmğan därigerlerdiñ ölim sebebin teksermey birden ötemaqı töleudi tapsırğan.

Elde naurızdan bastap 146 mıñnan asa adam indetke şaldığıp, eki mıñnan asa adam qaytıs boldı.

"The Qazaq Times"