Antaliyada Abay sayabağı aşıldı. Foto: QR SİM

Anadolı ölkesinde türki jwrtınıñ qaraşañırağı sanalatın Qazaq eliniñ wlı oyşılı Abaydıñ qwrmetine eskerkiş taqtası qoyılğan sayabaq aşıldı. 

Qazaqstandıqtarğa atauı jaqsı tanıs Antaliyada 23 qırküyek küni Abay Qwnanbaevtıñ 175 jıldığınıñ qwrmetine sayabaq aşıldı. Bwl ideyanıñ bastamaşısı – Qazaqstannıñ Türkiyadağı elşiligi.

Qazaqstannıñ sırtqı ister ministrliginiñ habarlauınşa, sayabaq aumağında oyşıl aqınnıñ qwrmetine ornatılğan estelik taqtanıñ aşıluı ötken.

Qazaqstannıñ Türkiyadağı elşisi Abzal Saparbekwlı bauırlas memleketke sayabaqtıñ aşıluına qoldau bildirgeni üşin alğısın bildirip, halıqaralıq deñgeydegi mwnday is-şaralar eki el arasındağı ıntımaqtastıqtı odan äri damıtuğa ıqpal etetinin jetkizdi.

Antal'yadağı Muratpaşa audanınıñ meri Umit Uysal sayabaqqa Abay esimin beru qazaq jäne türik halıqtarınıñ ruhani jäne mädeni jaqındığın körsetetin mañızdı oqiğa ekenin söz etti.

«Abay esimi – türki älemin biriktiruşi wlı esimderdiñ biri», – dedi ol.

Sayabaqtıñ aşılu qwrmetine koncert wyımdastırıldı, is-şarağa qatısuşılar Abay öleñderin mänerlep oqıp, änderin naqışına keltire orındadı.

Qazaq aqınınıñ sayabaqtağı eskertkiş taqtasınıñ aşıluına Muratpaşa audanınıñ meri Umit Uysal, eldiñ sayasi jäne qoğam qayratkerleri, Euraziya jäne Qazaqstan dostığı men mädenieti associaciyasınıñ törağası men müşeleri, sonday-aq, qazaq diasporasınıñ ökilderi, BAQ jäne qala qonaqtarı qatıstı.

Sayabaqtı aşu jiınına Türkiya şeneunikteri men sondağı qazaq diasporasınıñ ökilderi qatısqan. Foto: QR SİM

"The Qazaq Times"