Bügin äl-Farabi atındağı QazWU, Jurnalistika fakul'teti Baspagerlik-redaktorlıq jäne dizaynerlik öner kafedrasınıñ wyımdastıruımen wstaz, ğalım, jazuşı Äbilfayız Idırısovtıñ 90 jıldıq mereytoyına arnalğan «Baspa isi jäne dizayn»: bilim beru men zertteu mäseleleri» attı alqasöz ötti.

Alqasözge belgili qalamgerler, tanımal jurnalister men ğalımdar qatıstı.
Jiınnıñ bası saltanattı körmemen bastalıp, äri qaray ülken basqosuğa jalğastı. Alqasöz barısında twlğanıñ eñbegi men şığarmaşılığı eske alınıp, jılı estelikter aytıldı.

Ğibrattı ğwmırı keleşek wrpaqqa önege bolatın qazaqtıñ qabırğalı qalamgeri, belgili jurnalist, wlağattı wstaz Äbilfayız Idırısovtıñ qazaq halqına siñirgen eñbegi ayrıqşa zor.

Äbilfayız Idırısov 1930 jılı 23 aqpanında Qostanay oblısınıñ Amangeldi audanına qarastı Egindisay auılında tuğan. Jazuşı, jurnalist, pedagog, tarih ğılımdarınıñ kandidatı. «Söz qadirin öz qadirim» dep bilgen abız 800-den astam publicistikalıq maqala, oçerkter, oqulıqtar, «Qazaq jurnalistikasınıñ tarihı», «Oçerk jurnalistika janrı retinde», «Baspa önimderin äsemdeu», tağı basqa da pänder boyınşa ädistemelik qwraldar dayındağan. Sonday-aq, qazaqtıñ qabırğalı qalamgeri Äbilfayız Idırısov qazaq ädebietine «Ayjannıñ ğaşığı», «Berik», «Añsağan meniñ änimsiñ», «Aqsüyek», «Ker bwzaudıñ ölimi» attı tanımı mol, payımı keñ povesterin, «Tañşolpan» attı körkem romanın alıp keldi.

"The Qazaq Times"