AQŞ prezidenti Donal'd Tramp "Ülken jetilik" sammitine müşe elderdiñ Reseyge qatıstı wstanımı ärtürli ekenin rastadı.

"Keybireui menimen kelisedi, qalğandarı qarsı şıqtı", - dedi Tramp. Ol Franciyanıñ Biarric qalasında ötken "Ülken jetilik" sammitindegi kelissözder turalı pikirin jurnalistermen bölisti. Tramp sammitke Reseydi şaqıru - "paydalı" qadam dep biledi. Bwğan deyin ol bolaşaqta bwl forumğa Resey prezidenti Vladimir Putindi şaqıruı mümkin ekenin mälimdegen.

Tramptıñ aytuınşa, Franciyada ötken sammitte Reseyge qatıstı eşqanday şeşim qabıldanbağan. "Biz bwl mäseleni dauısqa salmadıq", - dedi ol.

Bwğan deyin Franciya prezidenti Emmanuel' Makron Reseydiñ klubqa qayta oraluınıñ kilti "Ukrainada" ekenin mälimdegen. Germaniya da Reseydiñ bwl forumğa qatısuına qarsı şıqqan, öytkeni Ukrainanıñ şığısında soğıs ayaqtalğan joq, al Qırım anneksiyalanğan küyi qaldı. Kanada men Wlıbritaniya ökilderi osı mazmwndas pikir aytqan. Italiya men Japoniya jetekşileri bwl mäselege qatıstı wstanımdarın jariyalamadı.

Wlıbritaniya, Germaniya, Italiya, Kanada, AQŞ, Franciya jäne Japoniya jetekşileriniñ eki kündik kezdesui senbide bastaldı. Sammitte Iran töñiregindegi jağday da talqılandı. "Jetilik" elderi Irannıñ yadrolıq bağdarlamasına jol joq ekendigi turalı wstanımın Tehranğa jetkizudi Franciya prezidenti Makronğa tapsırdı. Jeksenbi küni keşke Iran SİM basşısı Djavad Zarif kütpegen jerden Biarric qalasına wşıp şıqqan. Reuters agenttigi Tramptan bwnıñ sebebin swrağan, biraq ol jurnalist saualına jauap beruden bas tartqan.

"The Qazaq Times"