Almatıdağı Adam qwqıqtarı men zañdılıqtı saqtau jönindegi halıqaralıq byuroda Azattıq radiosı men QazTAG agenttiginiñ jurnalisterine jasalğan şabuılğa baylanıstı baspasöz mäslihatı ötti.

Jiınğa sayasatker Baltaş Twrsımbaev, Rısbek Särsenbay, jurnalist Ermwrat Bapi jäne Qazaqstandağı adam qwqıqtarı men zañdılıqtı saqtau halıqaralıq byurosınıñ direktorı Evgeniy Jovtis qatıstı.

Evgeniy Jovtistiñ sözinşe, jurnalister men byuro qızmetkerlerine şabuıl jasağan adamdardıñ artında bilik ökilderi twr jäne bwl jaqsılıqqa aparmaydı.

Sayasatker Baltaş Twrsımbaevtıñ oyınşa, şabuıl jasağan äyelder arnayı dayındalğan Nazarbaev pen Toqaevtıñ "jazalauşı jasağı".

"Bwnı bilik dayındağan. Eki kün ötti eşkim eşnärse jasağan joq. Nazarbaev pen Toqaevtıñ basqaruındağı qoğam qayda ketip baradı? Halıqtı bir-birine aydap salu arqılı azamattıq soğısqa bara jatır ma?.. Halıqtı Soltüstik Koreyada, Türkimenstanda qorqıtuğa boladı. Biraq Qazaqstanda halıqtı qorqıta almaysıñ... "Jazalauşı äyelder jasağı" özinikin jasadı. Qazir olar bir jerde demalıp jatqan şığar?" - dep mälimdedi Twrsımbaev.

"Bwl bilikten wyat ketti. Bwrın erkekterdi paydalanuşı edi, qazir äyelderdi paydalanuda. Äyelderdiñ artına tığıluda. Bwl sözsiz wyımdastırılğan närse. Meniñşe, bwnı jasap otırğan Twrğımbaev basqaratın İİM. Ministr bwnı "eki jaqtıñ daulasuı" dep otır. Demek, olar bwnı özderi jasap otır" - dedi Rısbek Särsenbay.

Ermwrat Bapidiñ pikirinşe, bwl bassızdıqtıñ artında Twrğımbaev qana twrğan joq. Onıñ artında "qaraqşı" bilik twr.

"Keşe Azattıq pen QazTAG jurnalisterine şabuıl jasalsa, erteñ özge jurnalister men qazaq qoğamına şabuıl jasaladı. Ukrainada "jasıl adamdar" payda bolsa, bizde qara nietti "qara adamdar" payda boluda. Ministr öziniñ jazasız qalatının biledi. Sebebi onıñ artında Nazarbaevtıñ jüyesi twr" - dep esepteydi Bapi.

Esteriñizge salayıq, osıdan birneşe kün bwrın Almatı qalasında Azattıq radiosı, QazTAG jäne Almatı arnasına belgisiz äyelder şabuıl jasağan. Keyinnen birneşe äyel äleumettik jeli arqılı jurnalisterden keşirim swradı

"The Qazaq Times"