الماتىداعى ادام قۇقىقتارى مەن زاڭدىلىقتى ساقتاۋ جونىندەگى حالىقارالىق بيۋرودا ازاتتىق راديوسى مەن قازتاگ اگەنتتىگىنىڭ جۋرناليستەرىنە جاسالعان شابۋىلعا بايلانىستى ءباسپاسوز ءماسليحاتى ءوتتى.

جيىنعا ساياساتكەر بالتاش تۇرسىمباەۆ، رىسبەك سارسەنباي، جۋرناليست ەرمۇرات باپي جانە قازاقستانداعى ادام قۇقىقتارى مەن زاڭدىلىقتى ساقتاۋ حالىقارالىق بيۋروسىنىڭ ديرەكتورى ەۆگەني جوۆتيس قاتىستى.

ەۆگەني ءجوۆتيستىڭ سوزىنشە، جۋرناليستەر مەن بيۋرو قىزمەتكەرلەرىنە شابۋىل جاساعان ادامداردىڭ ارتىندا بيلىك وكىلدەرى تۇر جانە بۇل جاقسىلىققا اپارمايدى.

ساياساتكەر بالتاش تۇرسىمباەۆتىڭ ويىنشا، شابۋىل جاساعان ايەلدەر ارنايى دايىندالعان نازارباەۆ پەن توقاەۆتىڭ "جازالاۋشى جاساعى".

"بۇنى بيلىك دايىنداعان. ەكى كۇن ءوتتى ەشكىم ەشنارسە جاساعان جوق. نازارباەۆ پەن توقاەۆتىڭ باسقارۋىنداعى قوعام قايدا كەتىپ بارادى؟ حالىقتى ءبىر-بىرىنە ايداپ سالۋ ارقىلى ازاماتتىق سوعىسقا بارا جاتىر ما؟.. حالىقتى سولتۇستىك كورەيادا، تۇركىمەنستاندا قورقىتۋعا بولادى. بىراق قازاقستاندا حالىقتى قورقىتا المايسىڭ... "جازالاۋشى ايەلدەر جاساعى" وزىنىكىن جاسادى. قازىر ولار ءبىر جەردە دەمالىپ جاتقان شىعار؟" - دەپ مالىمدەدى تۇرسىمباەۆ.

"بۇل بيلىكتەن ۇيات كەتتى. بۇرىن ەركەكتەردى پايدالانۋشى ەدى، قازىر ايەلدەردى پايدالانۋدا. ايەلدەردىڭ ارتىنا تىعىلۋدا. بۇل ءسوزسىز ۇيىمداستىرىلعان نارسە. مەنىڭشە، بۇنى جاساپ وتىرعان تۇرعىمباەۆ باسقاراتىن ءىىم. مينيستر بۇنى "ەكى جاقتىڭ داۋلاسۋى" دەپ وتىر. دەمەك، ولار بۇنى وزدەرى جاساپ وتىر" - دەدى رىسبەك سارسەنباي.

ەرمۇرات ءباپيدىڭ پىكىرىنشە، بۇل باسسىزدىقتىڭ ارتىندا تۇرعىمباەۆ قانا تۇرعان جوق. ونىڭ ارتىندا "قاراقشى" بيلىك تۇر.

"كەشە ازاتتىق پەن قازتاگ جۋرناليستەرىنە شابۋىل جاسالسا، ەرتەڭ وزگە جۋرناليستەر مەن قازاق قوعامىنا شابۋىل جاسالادى. ۋكراينادا "جاسىل ادامدار" پايدا بولسا، بىزدە قارا نيەتتى "قارا ادامدار" پايدا بولۋدا. مينيستر ءوزىنىڭ جازاسىز قالاتىنىن بىلەدى. سەبەبى ونىڭ ارتىندا نازارباەۆتىڭ جۇيەسى تۇر" - دەپ ەسەپتەيدى باپي.

ەستەرىڭىزگە سالايىق، وسىدان بىرنەشە كۇن بۇرىن الماتى قالاسىندا ازاتتىق راديوسى، قازتاگ جانە الماتى ارناسىنا بەلگىسىز ايەلدەر شابۋىل جاساعان. كەيىننەن بىرنەشە ايەل الەۋمەتتىك جەلى ارقىلى جۋرناليستەردەن كەشىرىم سۇرادى

"The Qazaq Times"