Astana Ankaranıñ halıqaralıq sahnadağı sayasatın qoldaydı, - dedi QR prezidenti N.Nazarbaev Türkiya prezidenti Rejep Tayıp Erdoğanmen birlese ötken baspasöz konferenciyasında. Bwl turalı Anadolu agenttigi habarlaydı.

QR Prezidenti äkimşiliginiñ baspasöz qızmetiniñ habarlauınşa, N.Nazarbaev türkiyalıq äriptesimen Ankarada ekjaqtı tiimdi kelissözder ötkizgen.  "Türkiya men Qazaqstan aymaqtıq jäne jahandıq mäselelerde birdey wstanımda. Eki eldiñ ıntımaqtastığı olardıñ ıntımaqtastığı men tarihına negizdelgen. Qazaqstan-Türkiya joğarı deñgeyli ıntımaqtastıq strategiyalıq üşinşi Keñesiniñ qorıtındıları eki eldiñ arasındağı ıntımaqtastıqtı bekitedi. Astana men Ankara arasındağı sayasi dialog damuda. Osığan baylanıstı elaralıq kezdesulerdi jalğastıru mañızdı", - degen N.Nazarbaev. Memleket basşısınıñ sözinşe, keşe türkitildes memleket basşılarınıñ qatısularımen Qırğızstanda ötken Türki keñesi sammitiniñ qorıtındıları da talqılanğan.

N.Nazarbaev, sonımen qatar: "Qazaqstanda türik kapitalımen jwmıs isteytin 800-den astam kompaniya bar. Ötken jıldıñ qorıtındıları boyınşa, eki el arasındağı tauar aynalımınıñ jalpı kölemi 1,9 milliard dollardı qwrdı. Qazirgi uaqıtta osı deñgeydi 5 milliardqa deyin , al keyin 10 milliard dollarğa jetkizu közdelude. Eki eldiñ ükimeti osı bağıtta jwmıs isteytin boladı», - degen.

Ayta ketu kerek, keşe, 13 qırküyekte N.Nazarbaev resmii saparmen Türkiyağa barğan edi. Ol onda Türkiya prezidenti Rejep Tayıp Erdoğanmen ekijaqtı kelissözder jürgizip, eki el basşıları Qazaqstan-Türkiya joğarı deñgeyli ıntımaqtastıq strategiyalıq Keñesiniñ üşinşi otırısın ötkizdi.

“The Qazaq Times”