Türkiya Wlttıq Mäjilisi törağasınıñ orınbasarı Ahmet Aydın. Foto: Türik Tele Radio.

Keşe, Astanada «Jaña jahandıq bolmıstağı Qazaqstannıñ jañğıru modeli» attı halıqaralıq konferenciya ötken bolatın. Konferenciya alda kele jatqan Twñğış prezident künine arnalıp wyımdastırılğan. Oğan BWW ökilinen tartıp älemniñ 14 elinen lauazımdılar jäne Qazaqstan ükimetiniñ ökilderi qatıstı. Türik elinen Türkiya Wlttıq Mäjilisi törağasınıñ orınbasarı Ahmet Aydın konferenciyada Gülenşilermen küresude qazaqstandıq äriptesteriniñ qoldauın swradı.

Türkiyanıñ «Türik Tele-Radio» qızmetiniñ resmi saytında keşegi konferenciya turalı habarlay kelip, Ahmet Aydınnıñ Fethullah Gülenniñ eki eldegi jaqtastarına ortaq küresu turalı sözderin alğa tartqan. Ahmet Aydın sözinde türik elinde ötken jıldıñ 15 şildesinde bolğan äskeri töñkerisinen keyin prezident Nwrswltan Nazarbaevtıñ qoldauına alğıs bildirdi. Sonımen birge, Fethullah Gülendi terroristik toptıñ jetekşisi retinde atap, onıñ qoldauşılarımen ortaq küresuge şaqırğan.

Ahmet Aydınnıñ sözine qarağanda Gülenşiler media, bilim beru jäne biznes salalarındağı qoldauşılarmen küresu üşin Qazaqstan men Türkiya arasında ıntımaqtastıq ornatu kerek eken. Konferenciyadan keyin Ahmet Aydın bastap kelgen delegaciya Qazaqstan Parlament Mäjilisiniñ törağası Nwrlan Nığmatulinmen jabıq kezdesude boldı. Kezdesude eki el arasındağı qarım-qatınastar talqılandı.

Ayta keteyik, Erdoğan biligi ötken jılı şildede bolğan äskeri töñkeristiñ bastı wyımdastıruşısı AQŞ-ta twratın Fethullah Gülen dep körsetedi. Türkiya ükimeti osı üşin AQŞ-tan Fethullah Gülendi Türkiyağa ötkizip beruin birneşe ret talap etti. Tipti, Türkiya jaqqa Qwrama Ştat tarabınan Gülendi wrlap şıqpaqşı boldı degen de ayıptar tağıldı.

“The Qazaq Times”