تۇركيا ۇلتتىق ءماجىلىسى توراعاسىنىڭ ورىنباسارى احمەت ايدىن. فوتو: تۇرىك تەلە راديو.

كەشە، استانادا «جاڭا جاھاندىق بولمىستاعى قازاقستاننىڭ جاڭعىرۋ مودەلى» اتتى حالىقارالىق كونفەرەنتسيا وتكەن بولاتىن. كونفەرەنتسيا الدا كەلە جاتقان تۇڭعىش پرەزيدەنت كۇنىنە ارنالىپ ۇيىمداستىرىلعان. وعان بۇۇ وكىلىنەن تارتىپ الەمنىڭ 14 ەلىنەن لاۋازىمدىلار جانە قازاقستان ۇكىمەتىنىڭ وكىلدەرى قاتىستى. تۇرىك ەلىنەن تۇركيا ۇلتتىق ءماجىلىسى توراعاسىنىڭ ورىنباسارى احمەت ايدىن كونفەرەنتسيادا گۇلەنشىلەرمەن كۇرەسۋدە قازاقستاندىق ارىپتەستەرىنىڭ قولداۋىن سۇرادى.

تۇركيانىڭ «تۇرىك تەلە-راديو» قىزمەتىنىڭ رەسمي سايتىندا كەشەگى كونفەرەنتسيا تۋرالى حابارلاي كەلىپ، احمەت ايدىننىڭ فەتحۋللاح گۇلەننىڭ ەكى ەلدەگى جاقتاستارىنا ورتاق كۇرەسۋ تۋرالى سوزدەرىن العا تارتقان. احمەت ايدىن سوزىندە تۇرىك ەلىندە وتكەن جىلدىڭ 15 شىلدەسىندە بولعان اسكەري توڭكەرىسىنەن كەيىن پرەزيدەنت نۇرسۇلتان نازارباەۆتىڭ قولداۋىنا العىس ءبىلدىردى. سونىمەن بىرگە، فەتحۋللاح گۇلەندى تەرروريستىك توپتىڭ جەتەكشىسى رەتىندە اتاپ، ونىڭ قولداۋشىلارىمەن ورتاق كۇرەسۋگە شاقىرعان.

احمەت ايدىننىڭ سوزىنە قاراعاندا گۇلەنشىلەر مەديا، ءبىلىم بەرۋ جانە بيزنەس سالالارىنداعى قولداۋشىلارمەن كۇرەسۋ ءۇشىن قازاقستان مەن تۇركيا اراسىندا ىنتىماقتاستىق ورناتۋ كەرەك ەكەن. كونفەرەنتسيادان كەيىن احمەت ايدىن باستاپ كەلگەن دەلەگاتسيا قازاقستان پارلامەنت ءماجىلىسىنىڭ توراعاسى نۇرلان نىعماتۋلينمەن جابىق كەزدەسۋدە بولدى. كەزدەسۋدە ەكى ەل اراسىنداعى قارىم-قاتىناستار تالقىلاندى.

ايتا كەتەيىك، ەردوعان بيلىگى وتكەن جىلى شىلدەدە بولعان اسكەري توڭكەرىستىڭ باستى ۇيىمداستىرۋشىسى اقش-تا تۇراتىن فەتحۋللاح گۇلەن دەپ كورسەتەدى. تۇركيا ۇكىمەتى وسى ءۇشىن اقش-تان فەتحۋللاح گۇلەندى تۇركياعا وتكىزىپ بەرۋىن بىرنەشە رەت تالاپ ەتتى. ءتىپتى، تۇركيا جاققا قۇراما شتات تارابىنان گۇلەندى ۇرلاپ شىقپاقشى بولدى دەگەن دە ايىپتار تاعىلدى.

“The Qazaq Times”