Imam qarttar üyinde

Ardaqtı payğambarımızdıñ (s.ğ.s) ömirge kelgen ayı – Mäulit merekesin layıqtı atap ötu, sol arqılı şapağatı mol şaralar wyımdastıru turalı QMDB-nıñ resmi tapsırmasına säykes, Öskemen öñiri boyınşa ökildiginiñ josparlı jwmıstarı ayasında, Şığıs Qazaqstan oblısı «Şemonaiha audandıq meşitiniñ» wyımdastıruımen audan ortalığındağı «Mügedek qarttar üyinde» Mäulit merekesi özgeşe naqışta ötti. Bwl turalı «Halifa Altay» meşitiniñ baspasöz qızmeti habarladı.

Mwnda audan imamı Ibragim Erkinbaywlı jarım köñil qariyalarğa qwrmet körsetip, Ardaqtı payğambarımızdıñ (s.ğ.s) ğibrattı ömirinen nasihat ayttı. Tağılımdı äñgimeni qarttar ıqılaspen tıñdadı.

Soñınan audandıq meşittiñ äyel jamağattarı Alla razılığı üşin dep mügedek qarttarğa dastarhan jaydı. Dastarhan basında ğibrattı nasihattar aytılıp, emen-jarqın äñgime örbidi. Jabırqaulı qarttardıñ bir serpilip qalğandığı bayqalıp twrdı.

Şarapatı mol şara wyımdastırğan «Şemonaiha audandıq meşiti» wjımına mekeme basşılığı şınayı alğıs ayttı.

"The Qazaq Times"