M.Äuezov atındağı Qazaq memlekettik akademiyalıq drama teatrınıñ direktorı Erlan Biläl.

Qazaq öneriniñ qara şañırağınıñ biri – M.Äuezov atındağı Memlekettik akademiyalıq drama teatrı öziniñ 92 jıldıq saliqalı tarihında ne bir belesterdi bağındırğan kieli öner wjımı. Akademiyalıq teatr adamzat mädenieti men ädebietiniñ jauharı sanalatın sahna öneriniñ qazaq topırağına tamır tartıp, örken jayuına negiz qalap, qazaqtıñ mädenieti men önerin zamanaui deñgeyge köteruge, Qazaqstan Respubliasınıñ ruhani damuına belsendi qızmet etip keledi.

Teatr repertuarı är kezeñde älem klassikteri men qazaq dramaturgiyasınıñ dañqtı tuındılarımen ayşıqtalıp otırdı. Sonıñ bir ayğağı retinde Mädeniet jäne sport ministrliginiñ tikeley qoldauımen  akademiyalıq teardıñ üstimizdegi jıldıñ  1-7 qazan aralığında Wlıbritaniyanıñ astanası London qalasında ötken  III Qazaqstan öneriniñ festivaline qatısuın aytuımızğa boladı.

Prezident Nwrswltan Nazarbaev biıl jariyalanğan «Bolaşaqqa bağdar: ruhani jañğıru» attı maqalasında jahandanu däuirindegi qazaqstandıq mädeniettiñ bügini men bolaşağına ülken män berip: «Biz HHİ ğasırdıñ jahandıq kartasında eşkimge wqsamaytın, derbes ornı bar wlt bolamız desek, «Jahandağı zamanaui qazaqstandıq mädeniet» jobasın iske asıruğa tiispiz. Älem bizdi qara altınmen nemese sırtqı sayasattağı iri bastamalarımızben ğana emes, mädeni jetistikterimizben de tanuı kerek», - degen edi. Osı bastamağa say Mädeniet jäne sport ministrligi joğarıda alğa qoyılğan mindetterdi jüyeli jüzege asıru üşin «Jahandağı zamanaui qazaqstandıq mädeniet» attı arnayı halıqaralıq joba qabıldağan bolatın. 19-qazanda Parijde, YUNESKO-nıñ ştabında ötken şarada osı bağdarlama jan-jaqtı tanıstırıldı. Akademiyalıq drama teatrdıñ osı jolğı London saparında Mädeniet jäne sport ministrliginiñ tikeley qoldauımen wyımdastırılğan Prezident bastamasın iske asıru bağıtındağı naqtı qadamı deuge boladı.

Akademiyalıq drama teatr  Şekispirdiñ otanı Angliya astanasına «Jaujürek» dramasımen bardı. Mwnıñ da özindik sebebi bar. Elimizde tayauda ğana ötken auqımdı, mañızdı jobanıñ biri – «Ekspo -2017» ayasında Mädeniet jäne sport ministrligi wyımdastırğan  Halıqaralıq mamandandırılğan körmeniñ mädeni bağdarlaması. Bağdarlama ayasında ärtürli bağıtta ötken teatr jäne kino festival'deri, koncertter qazaqstandıq jäne şeteldik qonaqtarğa erekşe äser qaldırğan bolatın. Körmeniñ Wlıbritaniya pavil'onında QR Mädeniet jäne sport ministri Arıstanbek Mwhamediwlı Wlıbritaniya men Qazaq eliniñ mädeniet pen ädebiet salasındağı baylanısınıñ artqanın aytıp, izgi tilegin bildirgen edi.  Eki el arasındağı dostastıq kezdesu, arağa köp uaqıt salmay Wlıbritaniyada öz jalğasın tabuğa sebepşi boldı.

Qazaqtıñ baluanı, änşi-kompozitor, seri, halıq arasında Baluan Şolaq atanğan Nwrmağanbet Baymırzawlınıñ ömirinen sır şertetin qoyılımdı teatr wjımı 1 qazan küni Stokuell teatrınıñ sahnasında körermenge wsındı. Bwl jalpı akamdemiyalıq teatr üşin de, Qazaqstan üşin de ülken jañalıq, bastama deuge boladı. Öytkeni qazaq teatrı öz tarihında wlttıq önerimen älemdik ülken mädeniet oşaqtarınıñ biri, teatrdıñ besigi sanalatın London da öner körsetti. Kelgen köp körermennen ağılşındardıñ qazaq önerin jılı qabıldağanın sezip twrdıq. Soñında ötken şığarmaşılıq kezdesude ädebiettanuşı Sara Kopley qazaq tarihı men mädenietine boylap, wlttıñ ruhani beynesin körsetetin qoyılımdı öziniñ joğarı bağalaytının jetkizdi. Britan-qazaq qoğamınıñ törağası Rupert Gudman da akterlerdiñ şeberligine tänti ekenin söz etti. «Qoyılımda eldiñ tarixı da, mädenieti de bar. Mwnda tek qazaqtıñ jağdayı ğana emes, xalıqaralıq mäsele de qozğaldı. Jalpı qazaq teatrınıñ Londonğa kelip öner körsetui jaqsı dästür», -dedi ol. Britandıq gruzin, rejisser David Papava spektakl'diñ boyındağı öner men wlttıq ruhtıñ ündestigine toqtala kelip «Kez kelgen alıp imperiyamen şektesip jatqan el tili men mädenietiniñ jwtılıp ketu qaupin ärqaşan da este wstağanı jön. Osı jağınan alğanda qoyılımnıñ taqırıbı bügin de özekti dep aytar edim», - degen jürek jardı lebizin bildirip, osınday qoylımdı älemdik mädeniettiñ ayasında nasiqattauğa at salısqan QR Mädeniet jäne sport ministrliginiñ qızmetine alğısın bildirdi. Öz kezeginde Qazaqstan Respublikasınıñ Wlıbritaniyadağı elşisi Erlan Idırısov mırza «Negizi elşi - men emes, nağız elşi - öner adamdarı, muzıkant, akter, sportşılar. Öytkeni, mädenietimiz arqılı, sporttıq jetistikterimiz arqılı bizdi el tanidı, öner arqılı eldiñ ruxani jandüniesin jetkizetin, jüregin jetkizetin de osı sport, teatr twlğaları», - dedi. Qazaq önerin, ädebietin, tarixın osınday teatr festivali arqılı älemge tanıtu - bizdiñ Prezidentimiz Nwrswltan Äbişwlı Nazarbaev halqımızdıñ aldına qoyğan mañızdı mindet - ruxani jañğırudıñ bir körinisi, - dep atap ötti elşi.

Jalpı bwl sapardıñ mäni men mağınası biz üşin aytıp tauısqısız deuge boladı. Osınday bedeldi elderde, teatr maytalmandarı arasında bizdiñ otandıq tuındımız, özimizdiñ ärtisterimiz orındauında sahnağa şığuı jäne jaqsı qabıldanuı biz üşin ülken quanış.

Erlan Biläl,

M.Äuezov atındağı Qazaq memlekettik

akademiyalıq drama teatrınıñ direktorı

“The Qazaq Times”