Foto: foodmarkets.ru

Qazaqstan 2017-2018 jıldarğa arnalğan astıq eksportına qatıstı boljamın 9 mln tonnağa deyin köterdi. Bwl turalı Ükimet otırısınıñ kuluarında QR Auıl şaruaşılığı vice-ministri Gülmira Isaeva mälimdedi.

Ol bwrınğı boljam boyınşa 8 mln tonna astıq eksporttalu kerek ekenin atap ötti. Onıñ sözinşe, Qazaqstan astığı Iran, Qıtay, Oñtüstik-Şığıs Aziya elderine eksporttaluı mümkin. Sonday-aq,  Ortalıq Aziya men Kaspiy aymağı elderi importer retinde qala beredi.

"Biılğı jıldıñ 25 qırküyegindegi jağday boyınşa Qazaqstan 20,368 mln tonna astıq jinadı. Ötken jıldıñ säykes kezeñinde körsetkiş 19,044 mln tonna bolğan. Biz bwdan bwrın jalpı jinalatın astıq kölemi  tazartılmağan künniñ özinde 19,5 mln tonna boladı dep boljağanbız. Ötken jılı 21,5 mln tonna bolğan", - dedi vice-ministr.

Bwdan bölek, Isaeva auıl şaruaşılığında ğalımdar oylap tapqan innovaciyalıq tehnologiyalardı  engizu qajet ekenin atap ötti. Alayda ğılımi instituttardıñ qajetti öndiristik infraqwrılımdarı bolmağandıqtan, oğan biznes te qosılu kerek.

Jalpı, 2018-2020 jıldarı agrarlıq ğılımdı qarjılandıruğa respublikalıq byudjetten bölingen qarjı 12,6 mlrd teñgeni qwraydı. Qarjılandıru ğılımdı damıtudıñ 21 basım bağıtı boyınşa jüzege asırıladı.

Ayta keteyik, bwğan deyin 2017 jıldıñ qañtar-şilde ayında Qazaqstannan 353,2 mln dollarğa 2,2 mln tonna biday eksporttalğanı  jäne bwl körsetkiş 2016 jıldıñ säykes kezeñimen salıstırğanda tonna boyınşa 13,1%-ğa, aqşalay türde 12,9%-ğa tömendegeni turalı habarlanğan.

“The Qazaq Times”