Özbekstan men Qazaqstan Respublikasınıñ sauda-ekonomikalıq ıntımaqtastığı ayasında Oñtüstik Qazaqstan oblısında twrmıstıq tehnika yağni gaz plitasın şığaratın ceh iske qosıldı. Bwl turalı Oñtüstik Qazaqstan oblısı äkimdiginiñ baspasöz qızmeti habarladı. 

Jılına 50 mıñ dana gaz plitasın qwrastıruğa  qauqarlı jobanıñ qwnı – 102 mln teñgeni qwraydı. Qazirgi tañda käsiporında qondırğılardı ornatu jwmıstarı ayaqtalıp, iske qosılğan.

«Artel Manufacturing» JŞS direktorı Ramzitdin Hikmatovtıñ sözinşe, kompaniya jeke qarjısına qondırğılardı satıp alıp, ornatıp şıqqan. Mwnda 30 adam twraqtı jwmıspen qamtılatın boladı. Şığarılğan önimdi işki narıqqa saudalau josparlanıp otır.

"Bizdiñ zauıtta dayındalğan gaz plitalarınıñ sapası şeteldik önimnen eş kem bolmaydı. Äri bağası da qazirgi narıqtağıdan tömen boladı»,-  dedi ol.

Ayta keteyik, QR Prezidenti Nwrswltan Nazarbaev qırküyektiñ 16-sı küni Taşkentke resmi is-saparmen barıp, Özbekstan Prezidenti Şavkat Mirzieevpen kezdesken edi. Eki el basşıları kezdesu barısında äskeri-tehnikalıq, transporttıq, energetikalıq, su şaruaşılığı jäne qarjı salaları boyınşa 10 qwjatqa qol qoyıp, Qazaqstan men Özbekstan qarım-qatınasınıñ jaña qadamdarğa ayaq basqanın däleldedi. Tipti osı uaqıtqa deyin köptegen şeteldik sarapşılar men batıs memleketteriniñ "Ortalıq Aziyada Qazaqstan men Özbekstan köşbasşı boluğa baqtalas bolıp keledi" degen pikirin joqqa şığardı.

“The Qazaq Times”