Resey «Islam memleketi» lañkestik wyımınıñ Süriya men Irakta jeñilis tabuı Ortalıq Aziyada twraqsızdıq ornatuı mümkin dep alañdaydı.

Resey Federaciyası «Islam memleketiniñ» Süriya men Irakta jeñiluinen keyin wyım qwramında bolğan Ortalıq Aziya memleketteriniñ azamattarı elderine qaytuı öñir tınıştığın bwzuı mümkin dep alañdaydı. Soñğı mälimetter boyınşa, «Islam memleketi» men «Front an-Nusr» lañkestik wyımdarınıñ qwramında 2012 jıldan beri 4 mıñnan astam Ortalıq Aziya elderiniñ azamattarı bolğan. Biraq AQŞ resmi Mäskeudiñ bwl mäselege baylanıstı alañdauşılığın asıra silteu dep esepteydi.

AQŞ sırtqı sayasatındağı Resey boyınşa sarapşısı Stiven Blenktiñ sözinşe, Ortalıq Aziyadan şıqqan Süriya men Irak aumağında soğısıp jürgen sodırlardıñ basım köpşiligi «Islam memleketi» sındı wyımdardıñ qwramına Resey arqılı kelgen. Olardıñ basım köpşiligi Reseyde migrant bolıp jwmıs istegender jäne olar RF aumağında jergilikti bilik ökilderi men orıs halqınan qattı qısım körgender. Bwl azamattardıñ Resey arqılı Ortalıq Aziyağa qaytıp oraluları eki talay.

Al AQŞ-tıñ Ortalıq Aziya boyınşa sarapşısı Noy Takkerdiñ oyınşa, Süriya men Iraktağı terrorlıq wyımdardıñ jeñilis tabuı Ortalıq Aziya tınıştığın bwzuı äbden mümkin. Sebebi «Islam memleketi» lañkestik wyımınıñ fanattarı bwğan deyinde Bişkek, Almatı, Duşanbe sındı qalalarda terrorlıq şabuıldar jasağan. Eger de Tayau Şığıstağı soğıs osı qalpında ayaqtalatın bolsa, onda lañkestik wyımdardıñ qwramında bolğan azamattar elderine qaytıp oralatındarı sözsiz. Bwl joğarıda atalğan qalalarda terrorlıq şabuıldardıñ bolu qaupin eki esege arttıradı. Qazirdiñ özinde Süriya men Irakta soğısıp jürgen Ortalıq Aziya memleketteri azamattarınıñ bir böligi Türkiyadağı öz elderiniñ elşilikterine barıp, öz erikterimen berilude. Al tağı bir böligi terrorlıq wyımdardıñ qwramında äli künge deyin soğısıp jür.

“The Qazaq Times”